Imibare mu mukino uhuza Gorilla na Gasogi United

Photo: I bumoso hari Hadji Mudaheranwa Youssuf, umuyobozi wa Gorilla FC naho i buryo ni KNC, umuyobozi wa Gasogi United

Kuri uyu wa kabiri tariki 10 Ukwakira 2023 nibwo Gorilla FC yakira Gasogi United mu mukino uraba urimo imibare myinshi no gucungana ku jisho.

Ni umukino w’umunsi wa 6 wa shanmpiyona ubera kuri Kigali Pele Stadium guhera saa cyenda z’umugoroba. Gasogi United irinjira muri uyu mukino ikubita agatoki ku kandi kuko iheruka gutsindwa inarushwa na Bugesera FC 3-0 mu mukino w’umunsi wa gatanu wa shampiyona.

Mu kwitegura uyu mukino, tariki 5 Ukwakira 2023, Gasogi United yakinnye imikino 2 ya gishuti n’amakipe yo mu cyiciro cya kabiri y’i Muhanga: The Winners FC na AS Muhanga, umunsi umwe ikoresheje amakipe abiri. Muri iyo mikino, Gasogi United yatsinze The Winners 5-0, inatsinda AS Muhanga 3-1.

Ubwo yabazwaga uko biteguye uyu mukino, Kakoza Nkuriza Charles (KNC), umuyobozi wa Gasogi United yavuze ko ari umukino uzaba uryoheye ijisho ariko utazoroha ku mpande zombi.

Icyo gihe yagize ati " Ni umukino uzaryohera abantu. Iyi match ya Gorilla dukeneye amanota kandi byanze bikunze ni umukino ufite igitutu ku batoza no ku bakinnyi. Gorilla ntiri heza na Gasogi ntiri heza."

Gutsinda uyu mukino byatuma Gasogi United byatuma iva ku mwanya wa gatanu igasatira ikipe ziri ku mwanya wa mbere (Musanze FC na APR FC zifite amanota 10).

Gorilla FC nayo irinjira muri uyu mukino ishaka amanota 3 ya mbere kuko mu mikino itanu imaze gukina ifite amanota 4. Yanganyije imikino ine ( Etincelles 1-1 Gorilla, Gorilla 0-0 Rayon, Muhazi 1-1 Gorilla, Gorilla 0-0 AS Kigali). Undi mukino Gorilla FC yatsinzwe na Kiyovu Sports 1-0. Kugeza ubu Gorilla FC iri ku mwanya wa 14 n’amanota 4.

Sengabo Jean Bosco bahimba Fatakumavuta, umuvugizi akaba anashinzwe itumanaho muri Gorilla FC yabwiye Rwandamagazine.com ko uyu mukino ari uwo gupfa no gukira kuribo.

Ati " Birumvikana ko ari umukino ufite byinshi uvuze kuri twe. Tumaze kunganya imikino 4, dutsindwa umwe. Ni umukino dukeneye kubonaho amanota 3 ya mbere muri shampiyona. Ni umukino twizeye gutsinda kuko uvuze byinshi kuri twe kandi n’ubushize twabatsinze 3-1."

Kwinjira kuri uyu mukino ni 1000 FRW ahasanzwe, ahatwikiriye ni 3000 FRW , VIP ni 5000 FRW naho VVIP ni 10.000 FRW.

Ku rutonde rw’agateganyo, Musanze FC iracyayoboye n’amanota 10 inganya na APR FC ariko Musanze FC ikaba izigamye ibitego 4 mu gihe APR FC izigamye ibitego 3.

Urutonde rw’agateganyo