REG BBC yari ihagarariye u Rwanda mu mikino ya nyuma y’irushanwa rya Basketball Africa League rya 2022, yasezerewe itarenze ¼ nyuma yo gutsindwa naorces Armées et Police (FAP) yo muri Cameroun amanota 66-63 mu mukino wabereye muri Kigali Arena kuri uyu wa Gatandatu.
Perezida Kagame, Amadou Gallo Fall uyobora Basketball Africa League na Masai Ujiri uyobora Toronto Raptors ikina muri NBA, bari mu batari bake barebye uyu mukino.
Imikino ya nyuma y’irushanwa ngarukamwaka rya Basketball Africa league iri kubera i Kigali ku nshuro yayo ya kabiri yikurikiranya, yatangiye kuri uyu wa Gatandatu aho yitabiriwe n’amakipe umunani.
REG BBC yari imbere y’abafana, yatsinzwe agace ka mbere ku manota 23-17, ariko itsinda aka kabiri kuri 14-13 (36-30).
Mu gace ka gatatu, FAP yongeyemo ikinyuranyo cy’amanota abiri (17-19) mu gihe REG BBC yitwaye neza mu gace ka nyuma, igatsinda ku manota 15-11 atari ahagije ngo ikinyuranyo cyose kirangire kuko hasigayemo atatu (63-66).
Cleveland Joseph Thomas Jr wa REG BBC yatsinze amanota 23 muri uyu mukino naho uwatsinze amanota menshi ku ruhande rwa FAP ni Deshaun Morman winjije 14.
Gutsindwa kwa REG BBC bivuze ko yasezerewe mu irushanwa mu gihe FAP izahura na Petro de Luanda yo muri Angola ku wa Gatatu, yo yageze muri ½ nyuma yo gutsinda AS Salé yo muri Maroc amanota 102-89 kuri uyu wa Gatandatu.
Indi mikino ya ¼ izaba ku Cyumweru ni uzahuza Zamalek ifite irushanwa riheruka na SLAC yo muri Sénégal ndetse n’uzahuza US Monastir yo muri Tunisia na Cape Town Tigers yo muri Afurika y’Epfo.
Perezida Kagame yari mu bitabiriye umukino wahuje REG BBC na FAP kuri uyu wa Gatandatu
