Mu mpeshyi y’uyu mwaka, amakipe yitabira shampiyona y’umupira w’amaguru ya Arabiya Sawudite yashushe n’ayiharira imitwe y’inkuru zo mu binyamakuru byandika ku mikino byo ku mugabane w’u Burayi no ku isi muri rusange. Ni nyuma y’aho abarimo Karim Benzema, N’Golo Kante na Ruben Neves basinye amasezerano yo gukinira amakipe yo muri icyo gihugu bahasanga Cristiano Ronaldo.
Ikigo cy’Igihugu Gishinzwe Iterambere n’ishoramari rya Rubanda muri Arabiya Sawudite (PIF) giherutse gufata ngo gicunge amakipe ane akomeye yo muri icyo gihugu ari yo Al-Ittihad, Al-Nassr, Al Hilal na Ahli byatumye agura abakinnyi bakomeye gusa n’andi makipe 14 yo mu cyiciro cya mbere afite abakinnyi bafite amazina azwi na bo.
Ushobora kuba warumvise bamwe mu bakinnyi n’abatoza baherutse kujya gukorera muri Arabiya Sawudite, nyamara ukaba utazi amakipe bagiyemo cyangwa n’abandi utari uzi ko bari muri iyi shampiyona.
Muri iyi nkuru dukesha BBC, turakugezaho amwe mu makipe akomeye muri iyi shampiyona n’abakinnyi bamwe bayigiyemo ndetse n’amakipe bakinira.
Abha
Abha, ikipe ikomoka mu mujyi binitiranwa, yakinaga mu cyiciro cya gatatu ejobundi mu mwaka w’imikino wa 2017-18 mbere y’uko izamuka ikajya mu cyiciro cya kabiri igahita inazamuka mu cya gatatu nyuma y’umwaka umwe. Kugeza ubu nta gikombe gikomeye iyi kipe iratwara.
Abha itozwa na Czeslaw Michniewicz wahoze atoza Polonye mu gikombe cy’isi giheruka kubera muri Qatar, mu gihe umukinnyi ifite w’izina rikomeye ari Felipe Caicedo, rutahizamu w’Umunya-Ecuador wakiniraga Manchester City mu myaka 14 ishize.
Al-Ahli
Al-Ahli ni imwe mu makipe akomeye kurusha andi muri iki gihugu ikaba kandi imwe mu yaheruka gufatwa na PIF. Iyi kipe ifite ibikombe bitatu bya shampiyona yari mu cyiciro cya kabiri mu mwaka ushize w’imikino gusa yazamutse mu cya mbere iri ku mwanya wa mbere. Iyi kipe y’i Jeddah isangira ikibuga yakiriraho imikino na Al-Ittihad iracyashaka umutoza.
Edward Mendy ni rimwe mu mazina akomeye mu mupira azaba ari muri Saudi Arabia
Roberto Firmino wahoze akinira Liverpool na Edward Mendy wahoze arinda izamu rya Chelsea ni bamwe mu bakinnyi b’amazina akomeye basinyiye iyi kipe muri iyi mpeshyi. Ezgjan Alioski wakinkiye Leeds na Modou Barrow wakiniye Swansea zo mu cyiciro cya mbere mu Bwongereza ndetse na Bastos wari myugariro wa Lazio ni abandi bakinnyi bazwi na Al-Ahli.
Al-Ettifaq
Iyi na yo yumvikanye cyane mu binyamakuru nyuma yo gusinyisha Steven Gerrard wabiciye bigacika nka kapiteni wa Liverpool ariko noneho ikaba yaramusinyishije nk’umutoza wayo.
Al-Ettifaq ni ikipe ya gatatu Steven Gerrard wabaye kapiteni wa Liverpool akayifasha gutwara UEFA Champions League mu 2005 azaba atoza nyuma ya Rangers yo muri Scotland aho yatangiriye neza uyu mwuga na Aston Villa yo yagezemo bikamwangira. Azatoza Al-Ettifaq uyu mwaka w’imikino.
Al Ettifaq iheruka gutwara igikombe muri za 1980.
Amin Younes ukina ku ruhande asatira akaba amaze guhamagarwa inshuro umunani mu ikipe y’igihugu y’Ubudage azaba akinira iyi kupe nyuma y’umwaka akina nk’intizanyo muri Utrecht mu gihe Robin Quaison ukinira Suwede na we azaba ari muri iyi kipe.
Al-Fateh
Al-Fateh yatwaye igikombe kimwe rukumbi igira mu mwaka wa 2013. Iratozwa na Slavan Bilic wahoze atoza West Ham yo mu Bwongereza wahawe akazi n’iyi kipe ejobundi muri Kamena uyu mwaka asimbura Georgio Donis wahoze akina mu bo hagati muro Blackburn Rovers ubu we wahawe akazi ko gutoza Al Wehda.
Umukinnyi w’iyi kipe uzwi ku ruhando mpuzamahanga rwa ruhago kurusha abandi ni Cristian Tello wakina asatira aca ku ruhande muri FC Barcelona akaba yaranahamagawe rimwe mu ikipe ya Esipanye. Mwene wabo Fran Velez ndetse na myugariro uca ibumoso wahoze akinira Monaco yo mu Bufaransa na bo ni abakinnyi bakinira iyi kipe bazwi bava i Burayi.
Al-Fayha
Al-Fayha yatwaye igikombe cya shampiyona ya Arabiya Sawudite mu 2017 ndetse n’Icy’Umwami mu 2022. Umutoza wayo ni Vuk Rasovic wahoze akinira Yugoslavia. Ikibuga cy’iyi kipe gifite ubushobozi bwo kwakira abafana 7.000 kikaba ari cyo kibuga gito mu byakira imikino ya shampiyona y’icyiciro cya mbere muri iki gihugu.
Vladmir Stojkovic umunyezamu w’ubunararibonye wahoze arinda izamu ry’ikipe y’igihugu ya Serbia ndetse na Wigan na Nottingham na we ni umukinnyi wavuye i Burayi ukinira iyi kipe. Hari kandi Milan Pavkov na we wakiniye Serbia ndetse na Aleksandar Trajkovski watsindiye Masedoniya ya Ruguru igitego cyabujije Ubutaliyani amahirwe yo gukina igikombe cy’isi cyo mu 2022.
Al-Hazem
Al-Hazem yazamutse mu cyiciro cya mbere umwaka uheruka w’imikino nta gikombe gifatika iratwara. Umutoza wayo Filipe Gouveia yakiniye kandi atoza amakipe atandukanye yo muri Portugal.
Ni imwe mu makipe make yo muri iyi shampiyona adafite abakinnyi bazwi icyakora umunyezamu wayo Aymen Dahmen yakiniye Tunisia.
Al-Hilal
Al-Hilal ifite agahigo ko kuba yaratwaye ibikombe bine by’imikino ihuza amakipe yabaye aya mbere iwayo ku mugabane wa Aziya ndetse n’ibikombe 18 bya shampiyona ya ArabiyaSawudite. Jorges Jesus wahoze atoza Benfica yasimbuye Ramon Diaz wahoze atoza Oxford FC ku mwanya wo gutoza iyi kipe muri iyi mpeshyi.
Kalidou Koulibaly yasinyiye Al-Hilal nyuma y’umwaka umwe musa akinira Chelsea
Al-Hilal na yo ubu iracungwa na PIF ikaba yarakoresheje miliyoni 47 z’amayero isinyisha kapiteni wa Wolves Ruben Neves ndetse ikagura Kalidou Koulibaly imukuye muri Chelsea hamwe na Sergej Milinkovic-Savic wahoze akina hagati mu kibuga muri Lazio.
Rutahizamu Moussa Marega wahoze akinira FC Porto, Matheus Pereira ukina hagati asatira wakiniye West Bromwich na Andre Carrillo, umunya-Peru uca ku mpande asatira wanakiniye Watford ni abandi bakinnyi bakinnye i Burayi bari muri iyi kipe.
Al-Ittihad
Al-Ittihad- na yo ubu icungwa na PIF- ni yo kipe ikomeye ihangana nk’umukeba mukuru wa Al-Hilal mu mukino w’ishiraniro uzwi nka Saudi’s Clasico. Ni yo iheruka gutwara igikombe cya shampiyona yo muri iki gihugu yatwaranye na Nuno Espirito Santo watoje Wolves na Tottenham.
Al-Ittihad yashinzwe mu 1927, ni yo kipe y’umupira w’amaguru imaze igihe kirekire kurusha izindi ibayeho muri Arabiya Sawudite.
Ni yo kipe yagiyemo abakinnyi b’amazina akomeye kurusha izindi muri iyi mpeshyi nyuma yo gusinyisha Karim Benzema watwaye Ballon d’Or iheruka.
Karim Benzema uheruka gutorwa nk’uwa 1 ku isi ubu na we ari muri Saudi
Ballon d’Or ni umupira wa zahabu uhabwa umukinnyi utorwa nk’umukinnyi uhiga abandi ubuhanga n’ibyo yagezeho ku giti cye kurusha abandi ku isi mu mwaka w’imikino.
Yanasinyishije kandi N’Golo Kante ufatwa nk’umwe mu bakinnyi bakina hagati bakomeye kurusha abandi ku isi muri iyi myaka 10 iheruka nyuma yo gutwara ibikombe bya shampiyona y’Ubwongereza mu makipe abiri atandukanye, icy’amakipe yabaye aya mbere iwayo (UEFA Champions League), Igikombe cy’Isi cyo mu 2018 ndetse na Jota yavanye muri Celtic kuri miliyoni 25 z’amayero.
Aba bakinnyi bagiyeyo basanga uwahoze ari umunyezamu wa Brazil Marcelo Grohe, myugariro Ahmed Hegazi wahoze muri West Brom ndetse na Igor Coronado Umunya-Brazil ukina hagati mu kibuga hagati waciye muri Banbury United mu 2012 azamukiye mu ishuri rya ruhago rya MK Dons.
Al-Nassr
Al-Nassr imaze gutwara ibikombe icyenda bya shampiyona ya Arabiya Sawudite yatanze umushi ayandi makipe y’amakeba ubwo yihariraga amezi menshi imitwe y’inkuru zo mu binyamakuru byo ku isi yose nyuma yo gusinyisha Cristiano Ronaldo watwaye Ballon d’Or inshuro 5 muri Mutarama uyu mwaka ubwo yatandukanaga na Manchester United.
Ronaldo yatsindiye iyi kipe ibitego 14 maze iyi kipe irangiriza ku mwanya wa kabiri muri shampiyona.
Muri iyi mpeshyi, Luis Castro, Umunyaporutigali mwene wabo wa Ronaldo yasimbuye Rudi Garcia nk’umutoza w’iyi kipe na yo ubu icunzwe na PIF.
Byitezwe ko C. Ronaldo azasangwa muri Arabiya Sawudite na benshi mu bakinnyi bakomeye
Kapiteni wa Inter Milan Marcelo Brozovic na we aherutse kujya muri iyi kipe mu gihe David Ospina wahoze arinda izamu rya Arsenal, Gonzalo Martinez wakiniye Argentina, rutahizamu Talisca wahoze akinira Benfica ndetse na myugariro wa Cote d’Ivoire Ghislain Konan na bo bakinira iyi kipe. Mukhtar Ali ubu ukinira Arabiya Sawudite na we yakiniye amakipe y’igihugu y’Ubwongereza y’abatarengeje imyaka 16 na 17.
Al-Okhdood
Al-Okhdood itaratwara igikombe gifatika na kimwe yari mu cyiciro cya gatatu mu myaka itanu ishize. Umutoza wayo Jorge Mendonca umutoza wungirije wa Reading kuva mu 2018 kugeza mu 2019.
Iyi kipe yo mu mujyi wa Majran nta bakinnyi bafite amazina azwi ifite uretse Paulo Vitor umunyezamu wo muri Brazil wayisinyiye muri iyi mpeshyi avuye muri Chaves yo muri Portugal.
Al-Raed
Iyi ni indi kipe nto ndetse y’ibigwi bidahambaye mu yari mu cyiciro cya mbere cya shampiyona y’umupira w’amaguru ya Arabiya Sawudite. Nta gikombe gifatika ifite ndetse kugeza ubu nta mutoza ifite. Yakirira imikino yayo ku kibuga kimwe na mukeba wayo Al-Taawoun biva mu mujyi umwe wa Buraidah.
Pablo Santos, myugariro wayo ukomoka muri Brazil yakinnye mu makipe yo mu cyiciro cya mbere muri Portugal, Uburusiya na Turkiye.
Al-Riyadh
Umwaka w’imikino mwiza uruta indi Al-Riyad yagize ni uwa 1993-94, ubwo yarangizaga ku mwanya wa kabiri muri shampiyona ndetse bagatwara n’Igikombe cy’Ikamba rya Cyambi ry’Igikomangoma (Crown Prince Cup).
Yazamutse mu cyiciro cya mbere mu mwaka ushize w’imikino ikaba iherutse no guha akazi k’ubutoza Umubiligi Yannick Ferrera.
Rutahizamu w’Umunyaseribiya Nikola Stojiljkovic ni umwe mu bayikinamo, akaba yaraciye muri shampiyona yo muri Portugal, Esipanye, Seribiya, Turkiye na Polonye.
Al-Shabab
Al-Shabab imaze gutwara ibikombe bitandatu bya shampiyona, ikaba irimo gushaka umutoza. Ever Banega wahoze ukina hagati mu kibuga akaba yarakiniye Argentine na Valencia yo muri Esipanye ni we mukinnyi wayo uzwi kurusha abandi.
Gustavo Cuellar, umukinnyi w’ikipe y’igihugu ya Colombia n’umunyezamu Kim Seung-gyu umaze kwitabirana ibikombe bitatu by’isi na Koreya y’Epfo na bo babarizwa muri iyi kipe.
Al-Taawoun
Iyi yatwaye Igikombe cy’Umwami mu 2019, itozwa n’Umunya-Brazil Pericles Chamusca nk’ikipe ya 30 atoje nubwo afite imyaka 57 y’amavuko misa.
Umunya-Esipanye ukina hagati mu kibuga Alvaro Medran wakiniye Real Mardid inshuro eshanu mu mwaka w’imikino wa 20215-16 kimwe na myugariro w’Umunya-Brazil Naldo na we akinira iyi kipe nyuma yo gukinira amakipe amwe yo ku mugabane w’Uburayi.
Al-Tai
Al-Tai na yo nta gikombe gifatika iratwara ikaba yarahaye Umunyakorowasiya Kresimir Rezic akazi k’ubutoza muri iyi mpeshyi.
Alfa Semedo, Umunya-Guinea-Bissau ukina hagati mu kibuga yakinnye nk’intizanyo muri Nottingham Forest na Reading mu cyiciro cya kabiri mu 2019 na 2021, na we arabarizwa muri iyi kipe.
Al-Wehda
Al-Wehda yashinzwe mu myaka 88 ishize iheruka gutwara igikombe mu 1966 hamwe n’Igikombe cy’Umwami. Georgio Donis wakiniye Ubugereki ubu ni we mutoza wayo akaba yarayigezemo avuye muri Al Fateh muri iyi mpeshyi asimbuye Jose Luis Sierra na we wakinaga hagati mu ikipe y’igihugu ya Chili.
Irimo myugariro Oscar Duarte, umunya-Costa Rica winjirije igitego igihugu cye gikina na Uruguay mu Gikombe cy’Isi cyo mu 2014 mu gihe umukinnyi wo hagati mu kibuga Faycal Fajr n’umunyezamu Munir Mohamedi na bo bakiniye Morocco mu gikombe cy’isi cyo mu 2018.
Damac
Damac iyi nta gikombe gifatika kizwi yatwaye kugeza ubu icyakora itozwa na Cosmin Contra wakiniye amakipe akomeye i Burayi arimo AC Milan, Atletico Madrid, West Brom n’ikipe y’igihugu ya Romania.
Bamwe mu bakinnyi mpuzamahanga bayirimo no Domagoj Antolic umaze guhamagarwa inshuro esheshatu muri Croatia na Adam Maher wakiniye Ubuholandi.
Khaleej
Habuze gato ngo Khaleej imanuke mu cyiciro cya kabiri mu mwaka w’imikino uheruka nyamara yari yazamutse iza muri iki cyiciro mu mwaka w’imikino wari wabanje. Itozwa n’Umunyaporutigali Pedro Emmanuel.
Lisandro Lopez wahamagawe inshuro enye mu ikipe y’igihugu ya Argentine akaba yarakiniye Benfica na Inter Milan ni umwe mu bakinnyi bari muri iyi kipe. Fabio Martins ni umwe mu bakinnyi bane bakiniye Portugal y’abato bari muri iyi kipe.
