Shampiyona y’Icyiciro cya Mbere mu Bwongereza, Premier League, igiye kuba ku nshuro ya 31, iratangira kare ugereranyije n’uko byari bisanzwe aho Crystal Palace ihura na Arsenal kuri uyu wa Gatanu mu gihe abakunzi ba ruhago bashaka kureba uko bazihuza n’Igikombe cy’Isi kizaba mu mpera z’uyu mwaka.
Ni Shampiyona irimo amategeko mashya
Impinduka zikomeye ziri muri uyu mwaka mushya w’imikino muri Premier League ni uko buri kipe yemerewe gusimbuza inshuro eshanu mu mukino mu gihe hari hamenyerewe eshatu.
Iri tegeko ryashyizweho muri Premier League hasozwa imikino yari isigaye mu mwaka w’imikino wa 2019/20 kubera icyorezo cya COVID-19 nyuma y’igihe kinini cya guma mu rugo.
Mu gihe shampiyona zitandukanye i Burayi no mu marushanwa ya UEFA bagumanye abasimbura batanu, ruhago y’u Bwongereza yo yari yasubiye kuri batatu.
Kuri ubu, abasimbura batanu bazaba bemewe bavuye mu bakinnyi icyenda bicara ku ntebe. Gusimbuza bizajya bikorwa mu bihe bitatu kongeraho kuba hari n’ibyakorwa hagati mu kiruhuko cy’umukino.
Indi mpinduka ni uko ku kibuga hazajya haba hari imipira 10 yo gukina kugira ngo hirindwe gutakaza igihe mu gihe umupira ugiye hanze.
Ni ukuvuga ko hari umupira uzajya uba uri gukinwa mu kibuga, uzajya uba uri hafi n’umusifuzi wa kane n’indi umunani izajya iba ifitwe n’abana basubiza imipira mu kibuga.
Amakipe mashya
Nottingham Forest yagarutse muri Premier League ku nshuro ya mbere mu myaka 23 kuva isubiye mu Cyiciro cya Kabiri mu 1998/99.
Byayisabye iminsi 8,414 n’imikino 1,069 kugira ngo yongere kuzamuka nyuma yo gutsinda Huddersfield igitego 1-0 kuri Stade Wembley muri Gashyantare.
Andi makipe abiri yazamutse yari aherutse mu Cyiciro cya Mbere vuba aha.
Scott Parker na Fulham bamanutse mu mwaka w’imikino wa 2020/21 bagarutse muri Premier League none ariko batari kumwe. Indi kipe yazamutse ni Bournemouth.
Kuva mu 2015/16, ni ubwa mbere Premier League igiye kuba itarimo Burnley yamanukanye n’amakipe ya Norwich City na Watford.
Abatoza bashya
Erik ten Hag ni umutoza wa munani ugiye gutoza Manchester United ubariyemo n’abayisigaranye by’agateganyo kuva Sir Alex Ferguson agiye mu 2013.
Uyu mugabo w’imyaka 52 yafashije Ajax gutwara ibikombe bitanu birimo bitatu bya Shampiyona mu Buholandi, aho yamaze imyaka ine n’igice ayitoza.
Manchester United izaba yizeye ko ashobora kuyifasha kwegukana igikombe gikomeye nyuma yo gutwara Europa League mu 2017.
Undi mutoza mushya ni Umunya-Wales Steve Cooper uri muri Nottingham Forest.
Uyu mugabo w’imyaka 46 utarakinnye mu Bwongereza, yatoje Abatarengeje imyaka 16 na 17 b’u Bwongereza mbere yo kuba umutoza wa Swansea.
Abakinnyi bashya
Habayeho guhindura amakipe no kugura abakinnyi bakomeye kw’amakipe yo muri Premier League ariko amaso menshi azaba ahanzwe Erling Haaland waguzwe na Manchester City FC.
Uyu mukinnyi waguzwe miliyoni 51£ muri Borussia Dortmund, yatsinze ibitego bisaga 130 muri iyo kipe n’ibindi 20 akinira Norvège. Ubu yujuje imyaka 22.
Ibindi byabaye ni ukubona Liverpool igurisha Sadio Mané muri Bayern Munich ikamusimbuza Darwin Nunez wavuye muri Benfica.
Tottenham yasinyishije Richarlison wakiniraga Everton, Manchester City igurisha Gabriel Jesus na Oleksandr Zinchenko muri Arsenal mu gihe Raheem Sterling yagiye muri Chelsea.
City yaguze Kalvin Phillips muri Leeds, Manchester United igura myugariro Lisandro Martinez muri Ajax naho Chelsea igura Kalidou Koulibaly muri Napoli.
Andi mazina akomeye yavuye muri Premier League arimo Alexandre Lacazette, Paul Pogba, Mané, Romelu Lukaku, Antonio Rudiger, Andreas Christensen na Raphinha.
Bwa mbere bazabaho ikiruhuko mu Ugushyingo n’Ukuboza
Byari bisanzwe ko muri Premier League habaho ikiruhuko mu itumba ariko kuri ubu kigijwe imbere.
Bwa mbere mu mupira w’u Bwongereza, hazashira ibyumweru bitandatu nta mukino ubaye mu itumba kubera Igikombe cy’Isi kizabera muri Qatar hagati y’Ugushyingo n’Ukuboza.
Nta mikino ya Premier League iteganyijwe hagati ya tariki ya 13 Ugushyingo n’iya 26 Ukuboza 2022.
Uyu mwaka w’imikino uratangira icyumweru mbere y’igihe cyari gisanzwe, tariki ya 5 Kanama, uzasozwe icyumweru nyuma, tariki ya 28 Gicurasi 2023, mu rwego rwo kuziba icyuho cy’Igikombe cy’Isi.
