Ikipe ya Rayon Sports yamaze gushyira aharagara ibiciro by’umukino w’Umunsi wa 24 wa Shampiyona uzayihuza na AS Kigali ku wa Gatandatu, tariki ya 23 Mata 2022, aho itike ya make izaba igura 2000 Frw naho iya menshi ikagura ibihumbi 20 Frw.
Uyu mukino uzabera kuri Stade ya Kigali i Nyamirambo guhera saa Cyenda.
Rayon Sports yatangaje ko ibiciro byo kwinjira kuri uyu mukino ku bicara mu myanya isanzwe ahadatwikiriye, bizaba ari 2000 Frw naho ku bicara ahatwikiriye mu ruhande bizaba ari 5000 Frw.
Abanyacyubahiro (VVIP) bemerewe no guparika imodoka zabo muri Stade bazishyura ibihumbi 20 Frw naho abicara iruhande rwabo (VIP) bazishyura ibihumbi 10 Frw.
Buri muntu wese ushaka kureba uyu mukino w’Umunsi wa 24 wa Shampiyona asabwa kuba “yarikingije COVID-19 inkingo zombie.”
Amatike y’uyu mukino agurwa umuntu anyuze kuri *939#.
Ubwo AS Kigali yakiraga Rayon Sports mu mikino ibanza, Gikundiro yatsinze ibitego 2-1.
Amakipe yombi agiye kongera guhura akurikiranye ku rutonde kuko Rayon Sports iri ku mwanya wa kane n’amanota 38 mu gihe AS Kigali ifite 37 ku mwanya wa gatanu.
