Ku myaka 22, Umunya-Norvège Erling Haaland yabaye umukinnyi wa mbere utsinze hat-trick [ibitego bitatu mu mukino umwe] inshuro eshatu zikurikiranya mu mikino yo mu rugo, ni nyuma yo kubikora ubwo Manchester City yanyagiraga United 6-3 kuri iki Cyumweru.
Manchester City yakiriye uyu mukino ishaka gukomeza gukubana na Arsenal iyirusha inota rimwe ndetse hari icyizere kuko rutahizamu wayo Haaland kuri ubu afite ibitego 17 mu mikino 10 amaze kuyinira kuva avuye muri Borussia Dortmund.
Iyi kipe yafunguye amazamu ku munota wa munani ku gitego cyinjijwe na Phil Foden mu gihe Haaland yatsinze ibindi bibiri ku munota wa 34 n’uwa 37.
Manchester United yinjijwe igitego cya kabiri ifite abakinnyi 10 mu kibuga ubwo Raphaël Varane yavurirwaga hanze, yatsinzwe igitego cyane kane na Foden ku munota wa 44.
Antony Dos Santos yagabanyije ikinyuranyo ku ishoti rikomeye yateye ku munota wa 56, atsindira Manchester United yakoze impinduka zitandukanye ishaka kuguma mu mukino.
Nyuma y’iminota itandatu, Haaland yatsinze igitego cya gatanu naho Foden atsinda icya gatandatu ku munota wa 72.
Anthony Martial winjiye asimbura, yatsinze igitego cya kabiri cya Manchester United ku munota wa 84, aninjiza penaliti yamukoreweho mu minota y’inyongera.
Gutsinda uyu mukino byatumye Manchester City igira amanita 20 ku mwanya wa kabiri, irushwa rimwe na Arsenal ya mbere. United iri ku mwanya wa gatandatu n’amanota 12.
