Gorilla FC yatsinze Gasogi United ibitego 3-2 mu mukino w’Umunsi wa cyenda wa Shampiyona wabereye kuri Stade ya Kigali i Nyamirambo kuri uyu wa Gatandatu.
Igice cya mbere cyarangiye Gasogi United ifite igitego 1-0 cyinjijwe na Adeshora Adeaga ku munota wa 15.
Ku munota wa 70, Iradukunda Simeon yatsinze igitego cya kabiri mu gihe Sindambiwe Protais yashimangiye intsinzi ku munota wa 85.
Gasogi United yabonye ibitego mu minota ya nyuma aho ku munota wa 88 hatsinze Maxwell Ndjoumekou waninjije penaliti yo ku munota wa kabiri w’inyongera.
Gutsinda uyu mukino byatumye Gorilla FC igira amanota 11 ku mwanya wa 10 mu gihe Gasogi United ifite amanota 14.
Uyu mukino wasize Gasogi United itaratsinda mu mikino ine yahuyemo na Gorilla FC kuva mu 2021. Yanganyije umwe, itsindwa itatu iheruka.
Mu yindi mikino yabaye kuri uyu wa Gatandatu, Bugesera FC yanganyije na Espoir FC igitego 1-1, Mukura VS itsinda Rutsiro FC ibitego 3-0.
Etincelles FC yari yakiriye Musanze FC iyitsinda ibitego 3-2 mu gihe Rwamagana City FC yatsinze Marines FC igitego 1-0.
AMAFOTO: RENZAHO Christophe
