Ikipe ya Gasogi United yanganyije na Musanze FC 1-1 mu mukino w’umunsi wa 10 wa Shampiyona, KNC avuga ko badacitse intege ndetse ko bakiri mu makipe ahatanira igikombe.
Hari mu mukino wabaye ku wa Gatandatu tariki 23 Ugushyingo 2024 wakirwa na Gasogi United.
Igitego cya Gasogi United cyatsinzwe na Malipangu Théodore naho icya Musanze FC gitsindwa na Johnson Adeshola wagitsinze mu minota ya nyuma y’umukino yishyura icyo Gasogi United yari yababanje.
Mu kiganiro n’abanyamakuru, KNC, umuyobozi wa Gasogi United yavuze ko ari umukino bari kuba batsinze hakiri kare kuko babonye uburyo bwinshi bwo gutsinda. Yavuze ko nubwo babonye inota rimwe ariko ngo ntabwo ikipe irava ku gikombe.
Ati " Urebye ukuntu iyi kipe ikina, ni ikipe iharanira igikombe kandi byose biracyashoboka."
Kunganya uyu mukino byatumye Gasogi United igira amanota 15. Iri ku mwanya wa 5. Musanze FC yo yahise igira amanota 8. Iri ku mwanya wa 12.
