Aleksandar Mitrovic yafashije Fulham kunyagira Preston ibitego 3-0, igaruka muri Shampiyona y’Icyiciro cya Mbere mu Bwongereza, Premier League, mu mwaka utaha w’imikino.
Ibitego bibiri uyu Munya-Serbia yatsinze mu gice cya mbere byatumye ageza 40 mu gihe ikindi cyatsinzwe na Fabio Carvalho.
Mitrovic yashoboraga gutsinda igitego cya gatatu mu gice cya kabiri, ariko agorwa n’umunyezamu wa Preston, Daniel Iversen.
Fulham y’umutoza Marco Silva yahise igira amanota 86 ku mwanya wa mbere ndetse izegukana Igikombe cya Championship niramuka itsinze Bournemouth ya kabiri ku wa Gatandatu.
Ni ku nshuro ya gatatu Fulham izamutse mu Cyiciro cya Mbere mu gihe cy’imyaka itanu.
