Ishyirahamwe ry’Umupira w’Amaguru mu Rwanda, FERWAFA, ryashyizeho uburyo abayobozi b’amakipe n’abatoza batanze abakinnyi mu Ikipe y’Igihugu bazarebamo umukino w’Amavubi na Ethiopia ku buntu.
Ku wa Gatandatu, tariki ya 3 Kanama 2022, saa Cyenda ni bwo Ikipe y’Igihugu izakira iya Ethiopia mu mukino wo kwishyura w’ijonjora rya nyuma ryo gushaka itike ya CHAN 2023 uzabera i Huye.
FERWAFA yamenyesheje abayobozi b’amakipe n’amashyirahamwe ayigize ko bateguriwe "accreditations’’ zibemerera kureba uwo mukino.
Yavuze ko "Accreditations zigenewe Perezida w’ikipe y’Umunyamuryango (Umutumirwa 1) cyangwa Ishyirahamwe (Umutumirwa 1) ndetse n’uwa Komisiyo (Umutumirwa 1)."
Yakomeje igira iti "Muri izo ’accreditations’ ziteganyijwe hiyongeraho izigenewe Abatoza bakuru (Head Coaches) n’abungirije (Assistant Coaches) bo mu makipe afite abakinnyi mu ikipe y’Igihugu izakina uwo mukino ariyo; APR FC, AS KIGALI, RAYON SPORTS, POLICE na SC KIYOVU (Abatumirwa 10)."
"Accreditations’’ zizatangirwa i Huye ku wa Gatandatu, tariki ya 3 Nzeri 2022, mbere y’umukino.
