FC Barcelone yatsindiwe ku kibuga cyayo na Cádiz igitego 1-0 bituma Real Madrid irushaho gusatira kwegukana Igikombe cya Shampiyona y’Icyiciro cya Mbere muri Espagne, La Liga.
Ikipe y’abashyitsi yari yatangiye umunsi iri mu makipe atatu yo munsi y’umurongo utukura, ariko igitego cyinjijwe na Lucas Perez nyuma gato y’akaruhuko k’igice cya mbere, cyayifashiie kugira ibyiringiro byo kutamanuka.
Uyu wabaye umukino wa mbere wa La Liga, FC Barcelone yatsinzwe kuva tariki ya 4 Ukuboza, ikaba yari imaze imikino 15 idatakaza.
Kuri ubu, iyi kipe iri ku mwanya wa kabiri n’amanota 60, irushwa 15 na Real Madrid mu gihe hasigaye imikino irindwi.
FC Barcelone yari imaze iminsi yitwara neza kuva ihawe umutoza Xavi mu Ugushyingo ndetse yanyagiye Real Madrid ibitego 4-0 mu mukino wabereye kuri Santiago Bernabeu mu kwezi gushize.
Gusa, kuri ubu i Camp Nou bagize icyumweru kibi dore ko gutsindwa kuri uyu wa Mbere byaje nyuma y’iminsi itanu batsindiwe mu rugo na Eintracht Frankfurt yabasezereye muri 1/2 cya Europa League.
Abakinnyi babiri baguzwe muri Premier League muri Mutarama, Pierre-Emerick Aubameyang na Adama Traoré, bombi ntibari muri 11 babanje mu kibuga ku mukino wa Cadiz ariko binjiye basimbura ntibabasha kwishyura.
Gutsinda uyu mukino byatumye Cádiz ifata umwanya wa 16 n’amanota 31, abiri hejuru y’umurongo utukura mu gihe isigaje imikino itandatu.
