Cristiano Ronaldo yashyize iherezo ku ntangiriro mbi yagize muri uyu mwaka w’imikino wa 2022/23, atsinda igitego cye cya mbere mu irushanwa rya Europa League ubwo Manchester United yatsindaga Sheriff Tiraspol 2-0.
Kuri uyu wa Kane, Manchester United yari ikeneye kwitwara neza nyuma yo gutsindwa umukino wa mbere yakiriyemo Real Sociedad mu cyumweru gishize.
Muri uyu mukino w’umunsi wa kabiri mu Itsinda E wabereye muri Moldova, ikipe y’umutoza Erik ten Hag yafunguye amazamu ku munota wa 17 ku gitego cyinjijwe na Jadon Sancho aherejwe na Christian Eriksen.
Habura iminota itandatu ngo amakipe yombi ajye kuruhuka ni bwo Manchester United yabonye igitego cya kabiri kuri penaliti yinjijwe na Cristiano Ronaldo ubwo Patrick Kpozo yari akiniye nabi Diogo Dalot mu rubuga rw’amahina.
Ronaldo yashoboraga kugeza ibitego 700 mu makipe atandukanye yakiniye ukuyemo Ikipe y’Igihugu ya Portugal, ariko uburyo yabonye mu gice cya kabiri ntiyabubyaza umusaruro.
Muri iri tsinda, Real Sociedad yabonye intsinzi ya kabiri nyuma yo gutsinda Omonia Nicosia ibitego 2-1.
