Rutahizamu w’Umunya-Portugal, Cristiano Ronaldo, yijeje ko azagaragara mu mukino wa gicuti Manchester United izahuramo na Rayo Vallecano kuri Old Trafford, ku Cyumweru.
Ronaldo ashaka ko Manchester United imurekura akajya gukina ahandi muri iyi mpeshyi ndetse ntiyitabiriye umwiherero utegura umwaka mushya w’imikino iyi kipe yagiriye muri Thaïlande na Australia kubera impamvu ze bwite.
Uyu mukinnyi w’imyaka 37, ntiyashyizwe kandi mu bakinnyi Manchester United ikoresha mu mukino wa gicuti yakiramo Atlético Madrid kuri uyu wa Gatandatu, i Olso muri Norvège.
Gusa, mu butumwa yanditse kuri Instagram, Cristiano Ronaldo yagaragaje ko azakina umukino bazahuramo na Rayo Vallecano yo muri Espagne ku Cyumweru.
Ubwo yagiraga icyo avuga ku butumwa bwa ‘Ronaldo fan page’ yagarukaga ku kuba asiba uyu mukino wo muri Norvège, yanditse ati “Domingo o rei joga” bisobanura ngo “Ku Cyumweru umwami azakina.”
Manchester United yatangaje ko abakinnyi batari muri 21 yajyanye i Oslo gukina na Atlético Madrid, bazakina ku Cyumweru na Rayo Vallecano mu gihe hari abasigaye kubera ko barwaye cyangwa bafite imvune.
Ronaldo yahuye n’umutoza Erik ten Hag ku wa Kabiri ndetse bivugwa ko yakomeje kugaragaza ko ashaka kuva muri Manchester United.
Ntiyagaragaye kandi mu mukino wa gicuti Manchester United yatsinzemo Wrexham ibitego 4-1, wabereye mu muhezo ku wa Gatatu.
Umutoza n’ubuyobozi bwa Manchester United bashimangira ko Ronaldo “atagurishwa”.
Ronaldo amaze umwaka umwe asubiye muri Manchester United nyuma yo kuva muri Juventus yo mu Butaliyani na Real Madrid yo muri Espagne.
Mu mwaka ushize w’imikino, ni we watsindiye Manchester United ibitego byinshi, 24, ariko ntacyo byafashije impande zombi kuko iyi kipe yasoje Shampiyona ya Premier League iri ku mwanya wa gatandatu bituma itazakina UEFA Champions League.
Gukina Europa League bwa mbere ni ibintu byagoye Cristiano Ronaldo kwiyumvisha, asaba ko yarekurwa agashaka indi kipe yerekezamo izakina Champions League.
Gusa amakipe atandukanye arimo Bayern Munich, Chelsea, Real Madrid, Paris Saint-Germain na Atlético Madrid yagaragaje ko atigeze amwifuza.
Manchester United izatangira umwaka w’imikino wa 2022/23 ihura na Brighton ku Cyumweru, tariki ya 7 Kanama.
Cristiano Ronaldo akomeje kugaruka mu itangazamakuru nyuma yo gusaba kuva muri Manchester United
