Kuri uyu wa Gatandatu, taliki 18 Kamena 2022, ni bwo hasozwa imikino y’irushanwa mpuzamahanga ryo Kwibuka “Kwibuka Women’s T20I Tournament 2022” ryatangiye taliki 9 Kamena 2022.
Imikino iteganyijwe, ikipe y’u Rwanda irakina na Uganda zihatanira umwanya wa 3. Uyu mukino urabera kuri Sitade ya Gahanga saa tatu n’igice (09h30). Mu mikino y’amajonjora, Uganda yari yatsinze u Rwanda.
Umukino wo guhatanira igikombe urahuza Tanzania yegukanye iki gikombe muri 2018 na Kenya ifite igiheruka muri 2021. Umukino urabera kuri Stade ya Gahanga saa saba n’igice (13h30). Mu majonjora, Tanzania yari yatsinze Kenya ku kinyuranyo cy’amanota 38.
Mbere y’iyi mikino y’umunsi wa nyuma, ku wa Gatanu taliki 17 Kamena 2022 habaye imikino ibiri yo guhatanira umwanya wa 5 n’uwa 7.
Mu guhatanira umwanya wa 5, ikipe ya Nigeria yitwaye neza itsinda Brazil. Ikipe ya Nigeria ni yo yatangiye ikubita agapira ishaka amanota “Batting” aho mu dupira 120 (20 Overs) yatsinze amanota 113 mu gihe abakinnyi 4 ari bo bavuye mu kibuga (4 Wickets).
Ikipe ya Brazil yasabwaga amanota 114 yatangiye gukubita agapira “Batting” maze mu dupira 120 (20 Overs) ikora amanota 83, abakinnyi 7 basohorwa mu kibuga (7 Wickets).
Ikipe ya Nigeria yahise yegukana umwanya wa 5 mu gihe Brazil yafashe umwanya wa 6.
Undi mukino wabaye wahuje ikipe ya Botswana n’u Budage zihatanira umwanya wa 7. Ikipe Botswana ni yo yabanje gukubita agapira ishaka amanota “Batting” maze mu dupira 120 (20 Overs) ikora amanota 107, abakinnyi 4 bava mu kibuga (4 Wickets).
Ikipe y’u Budage na yo yatangiye gukubita agapira ishaka amanota “Batting” maze mu dupira 97 (16.1 Overs) ikora amanota 108, abakinnyi 4 basohorwa mu kibuga (4 Wickets). Ikipe y’u Budage ni yo yahise yegukana umwanya 7 mu gihe Botswana yasoreje ku mwanya wa nyuma wa 8. Iyi kipe n’umwaka ushize wa 2021 na bwo yasoreje ku mwanya wa nyuma wa 5.
Ikipe y’u Rwanda irahatanira umwanya wa gatatu
Uganda yari yatsinze u Rwanda mu majonjora
U Budage bwasoreje ku mwanya wa karindwi
Botswana yabaye iya munani
Tanzanira irahabwa amahirwe ku gikombe gitangwa kuri uyu wa Gatandatu
Kenya na yo yageze ku mukino wa nyuma
