Ikipe y’Igihugu ya Tanzania ni yo yegukanye Irushanwa ryo Kwibuka Jenoside yakorewe Abatutsi mu Rwanda mu Mwaka w’i 1994. Iri Rushanwa rikaba ryakinwaga ku nshuro ya munani mu gihe u Rwanda n’Isi bibuka iyi Jenoside ku nshuro ya 28.
Iri rushanwa ryitabirwa n’amakipe y’abagore rizwi nka ‘Kwibuka T20’, Tanzania yaryegukanye nyuma yo guha isomo Ikipe y’Igihugu ya Kenya, iyitsinze ku kinyuranyo cy’amanota 44 (44 Runs).
Nyuma yo gutsinda uyu Mukino, Tanzania yakoze agahigo ko kwegukana iri rushanwa idatsinzwe Umukino n’umwe.
Iyi mikino ikaba itegurwa n’Ishyirahamwe ry’Umukino wa Cricket mu Rwanda, hagamijwe Kwibuka no guha icyubahiro Abatutsi bishwe mu gihe cya Jenoside yakorewe Abatutsi.
Uyu Mukino wakinwe kuri uyu wa Gatandatu tariki ya 18 Kamena kuri Stade Mpuzamahanga y’Umukino wa Cricket iri i Gahanga mu Karere ka Kicukiro mu Mujyi wa Kigali, ukaba wari ugamije kumenya uza kwegukana iri Rushanwa hagati ya Tanzaniya yaritwaye mu Mwaka w’i 2019 na Kenya yari ifite iry’Umwaka ushize w’i 2021, nyuma y’uko amakipe yombi agejeje ku munsi wa nyuma ariyo akurikiranye ku rutonde rw’Amakipe y’Ibihugu 8 yari yitabiriye iri Rushanwa.
Mbere yawo, Tanzania yagaragaraga nk’ikipe ntakorwaho, kuko yari yanatsinze Kenya mu Mukino twakwita uwo mu majonjora, mu gihe Kenya yari yaratakaje Umukino umwe gusa nawo yari yaratsinzwe n’iyi Tanzaniya byari bigeye guhura.
Ugutsinda kwa Kenya muri uyu mukino, byari kuba ukwihimura kuri Tanzania, kuko yari yarigaragaje nk’ikipe igoye gutsindwa, by’umwihariko uburyo ikubitamo Udupira (Batting) ndetse n’uburyo iba ihagaze mu Kibuga ( Fielding).
Mu gihe Kenya yo yagaragazaga ukwitwara nabi mu mukino, by’umwihariko aho yari isanzwe ifite imbaraga nko mu gutera Udupira (Bowling), kuko nk’Umukinnyi wayo ngenderwaho yahise akurwa mu Kibuga nyuma yo gufata agapira ke (Wicket) ku ikubitiro (Inning).
Kwegukana uyu mukino, Tanzania yabikesheje guhitamo Batting (Gukubita Udupira ushaka amanota) nyuma yo gutsinda Toss (Tombola), aho yitwaye neza mu gice cya mbere cy’Umukino, kuko yawutsinzemo amanota 144 (114 Runs), mu gihe yanakuye abakinnyi bose ba Kenya mu Kibuga (10 All outs), muri Overs 20.
Nyuma y’igice cya mbere, igice cya kabiri cyatangiye Kenya yizeye kuza gukuraho aya manota, ariko yaje gusanga yibeshya kuko bitayoroheye.
Kwitwara nabi mu gukubita Udupira, byafashije Tanzaniya kuyibuza kwishyurwa amanota yari yatsinze.
Mu buryo butunguranye, Kapiteni wa Kenya watangiye akubita Agapira ku ruhande rwa Kenya, Queentor Abel, yahise akurwa mu Kibuga n’abakinnyi ba Tanzaniya, ibi byanahise binaca integer hafi Ikipe yose ya Kenya kuko yari imwitezeho kuyiha Umusaruro.
Nyuma ya Overs 20, Kenya yazitwayemo nabi kuko yatsinzemo amanota 70 gusa, bityo Tanzaniya yegukana Umukino ku kinyuranyo cy’amanota 44 (44 Runs), bityo ihita inisubiza Igikombe yari yaregukanye mu Mwaka w’i 2019.
Nyuma yo kwegukana iri Rushanwa, Tanzaniya yahise iryegukana ku nshuro ya kabiri.
Nyuma yo kuryegukana mu Mwaka w’i 2019, Tanzaniya mu 2021 ntabwo yigeze yitabira iyi Mikino, nyuma y’uko benshi mu bakinnyi bayo n’abatoza basangwa barwaye Icyorezo cya Covid-19.
Mu Kiganiro yagiranye n’itangazamakuru, umutoza w’Ikipe y’Igihugu ya Tanzaniya yagize ati:”Ntabwo twitabiriye Irushanwa ry’Umwaka w’i 2021, bitewe na Covid-19. Ariko kuri iyi nshuro, tunejejwe no kongera kwitabira ndetse no kuba twegukanye Igikombe”.
Yunzemo agira ati:”Twagize igihe gihagije cyo ku ryitegura. Nejejwe kandi bikomeye n’uburyo abakinnyi banjye bitwaye, bitari kuri uyu Mukino wa nyuma gusa, ahubwo no mu Irushanwa ryose muri rusange”.
Nyuma y’iri rushanwa, hatanzwe bimwe mu bihembo by’abahize abandi, aho Umunya-Tanzaniya, Perice Kamunya yatowe nk’Umukinnyi witwaye neza ku Mukino wa nyuma, nyuma yo gutsinda amanota 29 mu 144 Ikipe ye yatsinze.
Aganira n’Itangazamakuru ati:”Kwegukana Igikombe byari ikintu Ikipe yari ishyize imbere kurusha ibindi byose kuva Irushanwa ryatangira”.
“Nejejwe bidasanzwe n’uburyo twitwaye uyu Munsi. Twakurikije ibyo Umutoza yadusabaga byose, ibi bikaba aribyo byatugejeje ku musaruro.”
Uganda yatsinze u Rwanda ku mukino w’umwanya wa gatatu
Mbere y’uyu mukino, ikipe ya Uganda yegukanye umwanya wa 3 itsinze ikipe y’u Rwanda. Muri uyu mukino, ikipe y’u Rwanda yatangiye ikubita agapira ishaka amanota “Batting” maze mu dupira 104 (17.2 Overs) ikora amanota 50.
Ikipe ya Uganda yatangiye gukubira agapira ishaka amanota “Batting” aho yasabwaga amanota 51. Mu dupira 58 (9.4 Overs) ikora amanota 54 ihita yegukana intsinzi.
Ikipe y’u Rwanda kugeza ubu ntirabasha kwegukana iri rushanwa ryo kwibuka, uyu mwaka nyuma y’imyiteguro yabereye muri Nigeria aho ikipe y’u Rwanda yakinnye imikino ya gicuti itandukanye ikitwara neza, intego yari ukwigukana iri rushanwa ryo Kwibuka ariko isoreza ku mwanya wa 4 aho yatsinze imikino 4 itsindwa indi 4.
Kapiteni w’ikipe y’u Rwanda, Bimenyimana Diane yatangaje ko intego batayigezeho kuko mu gukubita agapira bashaka amanota “Batting” bagifitemo ikibazo. Akomeza avuga ko irushanwa ribasigiye amasomo menshi kuko babonye uko abandi bakina bakaba bagiye gukosora cyane mu bijyanye na “Batting”.
Ibihembo byatanzwe
Umukinnyi w’ikipe y’u Rwanda, Ishimwe Gisele yatowe nk’umukinnyi ugaragaza ko azaba akomeye mu minsi iri imbere “Promising Player”.
Uwarushije abandi mu gukubita agapira “Best Batter” ni Kevin Owino (Uganda) watsinze amanota 253 mu mikino 8. Uwateye agapira neza “Best Bowler”, Nasra Nassoro Saidi (Tanzania ) wakuye abakinnyi 15 mu kibuga.
Uwakinnye neza mu kibuga hagati “Best Fielder” ni Mwanaidi Ammi Swedi (Tanzania) naho umukinnyi witwaye neza mu irushanwa ryose “MVP” aba Queentor Abel (Kenya).
Hatowe ikipe y’irushanwa
Iyi kipe igizwe na Fatuma Kibasu (Tanzania), Kevin Owino (Uganda),Christiana Gough (Germany), Queenton Abel (Kenya), Bimenyimana Marie Diane (Rwanda), Nara Nassoro Saidi (Tanzania), Consylate Awekonimungu (Uganda), Roberta Avery (Brazil),Salome Sunday (Nigeria), Evelyne Anypo (Uganda), Thapelo Modise (Botswana), Janet Mbabazi (Uganda), Florence Samanyika (Botswana) na Ishimwe Henriette (Rwanda).
Tanzania yegukanye umwanya wa mbere ikurikirwa na Kenya (2), Uganda (3), Rwanda (4), Nigeria (5), Brazil (6), Germany (7), Botswana (8).
Kuva muri 2014, ikipe ya Kenya ni yo imaze kwegukana iki gikombe inshuro nyinshi (4) harimo 2015, 2017, 2018 na 2021. Uganda ifite iki gikombe inshuro 2 (2014 na 2016) ndetse na Tanzaniya inshuro 2 (2019 na 2022).
