Guhera ku Cyumweru, tariki ya 28 Kanama 2022, Ishyirahamwe ry’umukino wa Cricket mu Rwanda (RCA) ku bufatanye na DAFABET hatangijwe irushanwa ryiswe DAFABET RCA T20 LEAGUE 2022.
Iryo rushanwa ryitabiriwe n’amakipe atandatu y’abagabo ariyo Kutchi Tigers CC, Challengers CC, Spartans CC, KCC, Zonic Tigers CC na Telugu Royals CC.
Ku munsi wa mbere w’irushanwa, Telugu Royals CC yakinnye na Kutchi Tigers CC.
Telugu Royals yatomboye kubanza gukubita cyangwa gutera udupira, maze bahitamo kubanza gukubita udupira ibizwi nka "Batting" ari nako bashaka uko bashyiraho amanota menshi.
Ikipe ya Kutchi Tigers yo yatangiye itera udupira ibizwi nka "Bowling".
Igice cya mbere cyarangiye Telugu Royals ishyizeho amanota 135 muri Overs 20 mu gihe abakinnyi barindwi aribo basohowe n’ikipe ya Kutchi Tigers.
Igice cya kabiri cyatangiye Kutchi Tigers isabwa amanota 136 kugira ngo ibe itsinze uyu mukino.
Gusa ntibyigeze biyorohera kuko yashyizeho amanota 81 muri Overs 15, abakinnyi 4 bayo basohorwa mu kibuga na Telugu Royals. Ibi byabaye hifashishijwe uburyo bwa DLS (Duckworth Lewis Stern method) kuko haguye imvura ituma uwo mukino utarangira.
Telugu Royals yatsinze ku kinyuranyo cy’amanota 15 mu gihe Simon Sessazi wa Telugu Royals yabaye umukinnyi w’umukino.
Mu mukino wakurikiyeho, Challengers yatsinze Spartans CC ku kinyuranyo cya Wickets 8.
Muri uyu mukino Spartans ni yo yatsinze tombola, bahitamo kubanza gukubita udupira ibizwi nka "Batting".
Igice cya mbere cyarangiye Spartans ishyizeho amanota 105 muri Overs 20 mu gihe abakinnyi 6 basohowe n’ikipe ya Challengers.
Igice cya kabiri cyatangiye Challengers isabwa amanota 106 kugira ngo ibe yegukanye intsinzi ya mbere muri iri rushanwa.
Baje no kubigeraho kuko muri Overs 18 n’udupira 5 bari bamaze gukuraho ikinyuranyo cyari cyashyizweho n’ikipe ya Spartans.
Ndikubwimana Didier wa Challengers ni we wabaye umukinnyi mwiza w’umukino aho yatsinze amanota 59 mu dupira 50 yakinnye.
Imikino y’umunsi wa kabiri w’irushanwa DAFABET RCA T20 LEAGUE 2022 izakomeza mu mpera z’iki cyumweru aho ku wa Gatandatu Spartans izakina na Zunic Tigers mu gihe ku Cyumweru ikipe ya KCC izakina na Challengers, Spartans ikine na Kutchi Tigers.
Imikino yose iri kubera kuri Stade mpuzamahanga ya Cricket iri i Gahanga.
Iri rushanwa biteganyijwe ko rizasozwa tariki ya 2 Ukwakira 2022.
