Tombola ya 1/8 cya UEFA Champions League yabaye kuri uyu wa Mbere yasize Paris Saint Geramain yo mu Bufaransa itomboye Bayern Munich yo mu Budage n’aho Liverpool yo mu Bwongereza itombora Real Madrid yo muri Espagne.
Ni tombola ibaye nyuma y’imikino y’amatsinda 8 aho buri tsinda ryazamuye amakipe 2, bivuze ko yari amakipe 16.
Amakipe 8 yazamutse ari aya mbere mu itsinda yatomboranye n’ayazamutse ari aya kabiri mu itsinda gusa na none amakipe yari mu itsinda rimwe ntiyagombaga gutomborona.
Bayern Munich, Chelsea, Benefica, Napoli, Manchester City, FC Porto, Tottenham na Real Madrid ni yo yazamutse ari aya mbere mu itsinda mu gihe Borussia Dortmund, RB Leipzig, Club Brugge, Eintracht Frankfurt, Liverpool, Paris Saint Germain, Inter Milan na AC Milan yazamutse ari aya kabiri.
Tombola yasize bamwe bavuga ko hari imikino ya nyuma ije mbere nk’uwo Bayern Munich ya Sadio Mane yatomboyemo PSG ya Lionel Messi ndetse n’umukino Liverpool ya Mohammed Salah yatomboyemo Real Madrid ya Karim Benzema cyane ko ari na yo makipe aheruka guhurira ku mukino wa nyuma wa Champions League muri Gicurasi uyu mwaka aho Real Madrid yegukanye igikombe iyitsinze 1-0.
Uko tombola yose yagenze
- Liverpool vs Real Madrid
- PSG vs Bayern Munich
- Eintracht Frankfurt vs Napoli
- Borussia Dortmund vs Chelsea
- Inter Milan vs FC Porto
- Club Brugge vs Benifica
- AC Milan vs Tottenham
- RB Leipzig vs Manchester City
Biteganyijwe ko imikino ibanza izaba tariki ya 14, 15, 21 na 22 Gashyantare 2023 n’aho iyo kwishyura ibe tariki ya 7, 8, 14 na 15 Werurwe 2023.
Habaye kandi na tombola 1/8 cya Europa League aho FC Barcelona izahura na Manchester United, Juventus ihure na Nantes, Sporting Club vs FC Midtjylaand , Shakhtar Donestk vs Rennes, Ajax vs Union Berlin, Bayern Leverkusen vs Monaco, Sevilla vs PSV, RB Salzburg vs Roma.
