Umutoza wa Gicumbi FC, Banamwana Camarade, yikomye bikomeye umusifuzi w’umukino ikipe ye yatsinzwemo na Musanze FC igitego 1-0 kuri uyu wa Gatandatu, avuga ko ari we wahaye amanota ikipe bari bahanganye.
Gicumbi FC ikomeje kuba ku mwanya wa nyuma n’amanota 16 mu gihe hasigaye imikino itandatu ngo Shampiyona igere ku musoza.
Nyuma yo gutsindirwa igitego 1-0 mu mukino w’Umunsi wa 24 wa Shampiyona wabereye kuri Stade Ubworoherane, Banamwana Camarade utoza Gicumbi FC yagize ati “Ni umukino umusifuzi abahaye amanota. Niba utabonye penaliti twibwe kuri iyi camera yawe, murakoze.”
Banamwana yavuze ko Gicumbi FC ifite ubushobozi bwo kubona amanota 14 mu mikino isigaye ku buryo itamanuka iramutse ihawe imisifurire ikwiye ku makipe ahanganye.
Ati “Dufite amanota 12 tuzakorera iwacu, hari Gasogi, Bugesera, Rutsiro na Etincelles FC, ayo ni amanota 12. Nihaza noneho imisifurire itabogamye, ikaba imisifurire ishaka gusifurira abantu bose kimwe, ayo manota twayabona natwe.”
“Ariko nihaza imisufurire nk’iyi ubona penaliti ikanga kuyitanga, bikiri ubusa ku busa, indi iraza ikagutsinda igitego kuko wayiteye imbaraga. Haracyari imikino itandatu y’amanota 18, birashoboka ko twabonamo amanota 14 tukagira amanota 30 ntitumanuke.”
Ku munsi wa 25 wa Shampiyona, Gicumbi FC izakurikizaho kwakira Etincelles FC mu mukino uzaba tariki ya 30 Mata 2022.
