Tombora y’uburyo amakipe azahura mu mikino Nyafurika ihuza amakipe, yasize AS Kigali itomboye kuzahura na Association Sportive d’Ali Sabieh Djibouti Télécom yo muri Djibouti muri mu ijonjora ry’ibanze rya CAF Confederation Cup ya 2022/23.
Kuri uyu wa Kabiri, tariki ya 9 Kanama, ni bwo habaye tombora y’amarushanwa Nyafurika ahuza amakipe ku cyicaro cya CAF giherereye mu Misiri.
AS Kigali izahagararira u Rwanda muri CAF Confederation Cup, yatomboye kuzahura na Association Sportive d’Ali Sabieh Djibouti Télécom yo muri Djibouti mu ijonjora rya mbere.
Imikino ibanza y’ijonjora rya mbere izaba hagati ya tariki ya 9 n’iya 11 Nzeri mu gihe iyo kwishyura izakinwa tariki ya 16-18 Nzeri 2022.
Ikipe izakomeza hagati ya AS Kigali na ASSAS Djibouti Télécom izacakirana na Al Nasry yo muri Libya mu ijonjora rya kabiri rizakinwa mu Ukwakira.
Mu mwaka ushize w’imikino wa 2021/22, AS Kigali yasezerewe na DCMP yo muri Repubulika Iharanira Demokarasi ya Congo mu ijonjora rya kabiri rya CAF Confederation Cup.
