Rutahizamu w’Umunya-Centrafrique, Caesar Lobi Manzooki wakiniraga Vipers SC yo muri Uganda, ashobora kugurwa na Simba SC yo muri Tanzania nk’umusimbura wa Kapiteni w’Ikipe y’Igihugu ‘Amavubi’, Meddie Kagere.
Manzooki amaze iminsi avugwa mu Rwanda ndetse byavugwaga ko ashobora kugera i Kigali mu mpera z’icyumweru gishize kuvugana na Rayon Sports.
SK13sports yo muri Uganda, yatangaje ko kuri ubu uyu mukinnyi ari kubarizwa muri Tanzania nyuma yo kuva muri Repubulika Iharanira Demokarasi ya Congo aho yari mu biruhuko.
Bivugwa ko uyu mukinnyi ashobora kugurwa na Simba SC ndetse akaba yifuzwa n’umukeba wayo, Yanga SC.
Binzubeiry yo muri Tanzania yanditse ko Simba SC yatangiye gutekereza uburyo yatandukana na Kapiteni w’Amavubi, Meddie Kagere, ikamusimbuza rutahizamu ukiri muto kandi wihuta.
Meddie Kagere wabaye umukinnyi watsinze ibitego byinshi muri Tanzania mu myaka ibiri ishize, kuri ubu yasoje Shampiyona ya 2021/22 atsinze ibitego birindwi gusa.
Ku rundi ruhande, nubwo Caesar Manzooki yamaze gusezera abakunzi ba Vipers SC binyuze mu butuma yashyize kuri Twitter, ruracyageretse hagati ye n’iyi kipe yakiniraga.
Thank you for your love i will never forget # one team one dream# pic.twitter.com/X2EjqB0bRu
— Cesar Manzoki (@CesarManzoki) June 27, 2022
Vipers SC ivuga ko ubwo uyu mukinnyi yayigeragamo mu 2020, yasinye amasezerano y’imyaka ibiri arimo ingingo yo kongeraho indi ibiri mu gihe we avuga ko yasoje imyaka ibiri yari yasinye ku bihumbi 15$.
Caesar Lobi Manzooki wakiniye AS Vita Club, ni rutahizamu ukomeje kuvugisha benshi muri Afurika y’Iburasirazuba nyuma y’uko yabaye umukinnyi watsinze ibitego byinshi muri Shampiyona ya Uganda aho yinjije 18 mu mwaka w’imikino urangiye.
Caesar Manzooki yerekeje muri Tanzania kuvugana n’amakipe arimo Simba SC
Manzooki ni rutahizamu wigaragaje mu mwaka ushize w’imikino muri Shampiyona ya Uganda
Vipers SC ivuga ko uyu mukinnyi akiyifitiye amasezerano y’imyaka ibiri
Kapiteni w’Amavubi, Meddie Kagere ashobora gutandukana na Simba SC
