Ishyirahamwe ry’Umupira w’Amaguru mu Rwanda (FERWAFA) ryemeje ko Shampiyona y’Icyiciro cya Mbere mu bagabo izatangira ku wa 19 Kanama 2022.
Iki cyemezo cyamenyeshejwe amakipe nyuma y’inama nyunguranabitekerezo yayahuje n’ubuyobozi bwa FERWAFA ku wa Kabiri, tariki ya 12 Nyakanga.
Kuri uyu wa 13 Nyakanga, Umunyamabanga Mukuru wa FERWAFA, Muhire Henry, yandikiye amakipe yose akina Icyiciro cya Mbere ayamenyesha ko Shampiyona izabanzirizwa n’umukino wa Super Cup uzahuza APR FC na AS Kigali nk’uko byari byaganiriweho.
Yagize ati "Shampiyona y’Icyiciro cya Mbere mu bagabo ya 2022/23 izatangira tariki 19/8/2022 naho umukino wa ’Super Cup’ uzahuza ikipe yatwaye Shampiyona n’iyatwaye Igikombe cy’Amahoro ukaba uteganyijwe tariki ya 14/08/2022."
Yibukije amakipe ko igihe cya mbere cyo kwandikisha abakinnyi giteganyijwe hagati ya tariki ya 6 Kamena n’iya 18 Kanama 2022 nk’uko bigaragara muri FIFA TMS.
