Ibitego bya David Alaba na Karim Benzema wagejeje 324 kuva atangiye gukinira Real Madrid , byafashije iyi kipe yo muri Espagne gutsinda Eintracht Frankfurt 2-0, yegukana UEFA Super Cup ya 2022.
Igikombe kiruta ibindi i Burayi gikinirwa n’ikipe yatwaye UEFA Champions League ndetse n’iyatwaye Europa League.
Ku wa Gatatu ni bwo i Helsinki habereye umukino wa Real Madrid na Eintracht Frankfurt zatwaye ibikombe byombi mu mwaka ushize w’imikino wa 2021/22.
Ikipe y’umutoza Carlo Ancelotti, yatsinze Liverpool ku mukino wa nyuma wa Champions League muri Gicurasi, yafunguye amazamu ku gitego cyatsinzwe na David Alaba ku munota wa 37 ubwo umunyezamu Kevin Trapp yari yakurikiye umupira w’umutwe watewe na Casemiro.
Benzema yashimangiye intsinzi ya Real Madrid nyuma y’akaruhuko ku mupira wari uvuye kuri Vinicius Junior ku munota wa 65.
Iki gitego Benzema yatsinze cyatumye atambuka kuri Raul mu bakinnyi bamaze gutsindira Real Madrid ibitego byinshi, asigara arushwa na Cristiano Ronaldo ufite ibitego 450.
Bwari ubwa mbere Frankfurt ikinnye umukino wa UEFA Super mu gihe Real Madrid yayegukanye ku nshuro ya gatanu.
