Ikipe y’Igihugu ya Beach Volleyball mu bagabo igizwe na Ntagengwa Olivier na Gatsinzi Venuste yananiwe kugera ku mukino wa nyuma mu mikino ya Commonwealth iri kubera mu Bwongereza, ni nyuma yo gutsindwa n’Abanya-Australia amaseti 2-0 (21-18, 21-15).
Ntagengwa na Gatsinzi bari bitezweho gushimangira ko bazahesha u Rwanda umudali wa mbere kuva mu 2010 ubwo rwatangiraga kwitabira Imikino ihuza ibihugu bikoresha Icyongereza (Commonwealth Games).
Gusa, kuri uyu wa Gatandatu batsinzwe n’Abanya-Australia Chris McHugh na Paul Burnett amaseti 2-0 (21-18, 21-15) mu mukino wa ½.
Gutsindwa uyu mukino bivuze ko aba bakinnyi b’Abanyarwanda bazahatanira umudali w’Umuringa (Bronze) mu mukino w’umwanya wa gatatu uzaba ku Cyumweru.
Bazahura n’impanga z’Abongereza Javier na Joaquim Bello zatsinzwe n’Abanya-Canada Sam Schachter na Daniel Dearing amaseti 2-1 (15-21, 21-13, 15-7) mu wundi mukino wa ½.
Muri iyi Mikino ya Commonwealth iri kubera i Birmingham mu Bwongereza kuva tariki ya 28 Nyakanga, u Rwanda rwaserukiwe muri Beach Vollyeball, Gusiganwa ku maguru, Koga n’Amagare ariko kugeza ubu ruri mu bihugu bitarabona umudali mu gihe hasigaye iminsi ibiri gusa ngo isozwe.
