Bayern Munich yegukanye Igikombe cya Shampiyona ku nshuro ya 10 yikurikiranya (Amafoto)

Ikipe ya Bayern Munich yegukanye Igikombe cya Shampiyona y’Icyiciro cya Mbere mu Budage, Bundesliga, ku nshuro ya 10 yikurikiranya nyuma yo kwihaniza mukeba, Borussia Dortmund, yatsinze ibitego 3-1 kuri uyu wa Gatandatu.

Muri uyu mukino uzwi nka Der Klassiker wabereye kuri Allianz Arena, Bayern Munich yafunguye amazamu ku munota wa 15 ku gitego cyinjijwe na Serge Gnabry.

Habura iminota 11 ngo amakipe yombi ajye kuruhuka, Robert Lewandowski yashimangiye intsinzi hakiri kare, atsinda igitego cya kabiri ku mupira yahawe na Thomas Müller.

Emre Can yatsinze penaliti yafashije Borussia Dortmund kugaruka mu mukino ku munota wa 52, ariko Jamal Musiala atsindira Bayern igitego cya gatatu nyuma yaho, ku munota wa 83.

Gutsinda uyu mukino byatumye Bayern Munich ishyiramo ikinyuranyo cy’amanota 12 hagati yayo na Borussia Dortmund, biyihesha kwegukana Igikombe cya Shampiyona y’Icyiciro cya Mbere mu Budage ku nshuro ya 32.

Iki gikombe ni cyo cya mbere cya Bundesliga cyegukanywe n’umutoza
Julian Nagelsmann mu gihe kandi ikipe ye yagejeje ku mikino icyenda yikurikiranya idatsindwa.

IZINDI NKURU
Ibitekerezo(0)
Tanga Igitekerezo