Abakinnyi batatu mu bavuye mu marushanwa ya academies za Bayern Munich bamaze gusanga bagenzi babo bari mu mwiherero w’ikipe y’igihugu Amavubi y’abatarengeje imyaka 15 wo kwitegura CECAFA y’abatarengeje iyo myaka igomba kubera muri Uganda guhera tariki 4 kugeza tariki 18 Ugushyingo 2023.
Kuri uyu wa gatatu tariki 25 Ukwakira 2023 nibwo abo bakinnyi 3:Mutangwa Cedrick, Ishimwe Elie na Hategekimana Abdouladhim bageze mu Bugesera kuri Hotel La Palisse aho bagenzi babo bari. Baraye bageze mu Rwanda bavuye mu Budage aho bari mu ikipe ya Bayern Munich ishami ry’u Rwanda aho bari bagiye mu Budage mu marushanwa ahuza academies za Bayern Munich zo ku isi.
Mutangwa Cedrick wahamagawe avuye muri The Winners ni umunyezamu, Ishimwe Elie wahamagawe avuye muri Tsindawe Batsinde ni rutahizamu uca ku ruhande rw’i bumoso naho Hategekimana Abdouladhim wahamagawe avuye muri Tiger academy ni rutahizamu.
Irushanwa nk’iri ryaherukaga kuba muri 2019 i Assmra muri Eritrea. Icyo gihe ryegukanywe na Uganda itsinze Kenya ku mukino wa nyuma.
Iry’uyu mwaka rizabera kuri FUFA technical centre i Njeru guhera tariki 4 Ugushyingo 2023 kugeza tariki 18 Ugushyingo 2023. Ikipe y’igihugu, Amavubi biteganyijwe ko izahaguruka mu Rwanda tariki 2 Ugushyingo yerekeza muri Uganda aho iri rushanwa rizabera.
Abemerewe kwitabira irushanwa ry’uyu mwaka ni abari hagati y’imyaka 11 na 15.
Uhereye i bumoso hari Hategekimana Abdouladhim , Mutangwa Cedrick na Ishimwe Elie
PHOTO:RENZAHO CHRISTOPHE
