Ishyirahamwe ry’umukino wa Basketball mu Rwanda (FERWABA) ryakubye inshuro zirenga zirindwi agaciro k’ibihembo biherekeza igikombe cya Shampiyona y’Icyiciro cya Mbere mu bagabo n’abagore, kagera kuri miliyoni 15 Frw ku ikipe ya mbere.
Mu mwaka ushize w’imikino, Amakipe ya REG mu bagabo n’abagore, aheruka kwegukana Shampiyona, buri imwe yahawe miliyoni 2 Frw.
Aya mafaranga yiyongeragaho andi yatanzwe n’abaterankunga kugira ngo afashe aya makipe kwitabira amarushanwa mpuzamahanga.
Mu kiganiro n’abanyamakuru cyakurikiye isinywa ry’amasezerano hagati ya FERWABA n’ikinyobwa cya Bralirwa kizwi nka “Cheetah Energy”, Mugwiza Désiré uyobora iri Shyirahamwe yavuze ko “Ikipe ya mbere mu bagabo izahabwa miliyoni 15 Frw.”
Yongeyeho ko “iya mbere mu bagore, izajya ihabwa miliyoni 10 Frw” ariko ikanagenerwa andi miliyoni 5 Frw ayifasha kwitegura imikino y’Akarere ka Gatanu (Zone V).
Asobanura iby’ibi bihembo bisa n’ibitangana mu byiciro byombi, Mugwiza Desire yavuze ko harebwe ku mubare w’imikino amakipe aba yakinnye, ariko na none yemeza ko birangira amafaranga yo mu byiciro byombi angana, ari miliyoni 15 Frw.
Ati “Ubundi abagabo, iyo ubaye uwa mbere ujya muri Basketball Africa League (BAL) kandi hari inkunga babona, ariko iyo ugiye muri Zone V nta nkunga uhabwa, ikipe yirwanaho. Ni yo mpamvu twavuze ko tuzajya tubagenera miliyoni 5 Frw.”
Yakomeje agira ati “Kuba twavuze miliyoni 10 Frw bwa mbere, iyo urebye imikino abagore bafite ni mike kuko bafite amakipe atandatu mu gihe abandi [abagabo] ari amakipe 14. Urumva imbaraga bashyizemo n’imikino bakinnye ntabwo bingana.”
Ikipe ya kabiri mu bagabo izahabwa miliyoni 10 Frw, iya gatatu miliyoni 5 Frw.
Mu Cyiciro cya Kabiri cyatangiye gukinwa uyu mwaka mu bagabo, ikipe ya mbere izahembwa miliyoni 5 Frw.
Kongera umubare w’amafaranga ahabwa amakipe yitwaye neza muri Shampiyona bije bikurikira amasezerano y’imyaka itatu hagati ya FERWABA na Cheetah Energy drink, afite agaciro ka miliyoni 240 Frw kugeza mu 2024.
REG BBC yahawe miliyoni 2 Frw nyuma yo kwegukana Shampiyona mu 2021
REG WBBC ni yo ifite Igikombe cya Shampiyona iheruka mu bagore
Perezida wa FERWABA, Mugwiza Désiré, yavuze ko ikipe izegukana Igikombe cya Shampiyona y’Icyiciro cya Mbere mu bagabo n’abagore, izabona agera kuri miliyoni 15 Frw
