Amakipe 18 ni yo ategerejwe ko azitabira imikino y’irushanwa ry’Intwari mu mukino wa Basketball “National Heroes Tournament 2020”, ry’uyu mwaka wa 2020, rizaba kuva tariki 24 Mutarama kugeza tariki 2 Gashyantare 2020.
Iri rushanwa ngarukamwaka ritegurwa n’Ishyirahamwe Nyarwanda ry’Umukino wa Basketball “FERWABA”, ku bufatanye n’Urwego rw’Igihugu rushinzwe Intwari, Imidari n’Impeta by’Ishimwe “CHENO”.
Muri aya makipe 18 azitabira iri rushanwa ry’uyu mwaka wa 2020, arimo amakipe 13 y’abagabo na 5 y’ikiciro cy’abagore. Mu makipe y’abagabo hari; REG BBC, Patriots BBC, APR BBC, Espoir BBC, IPRC Huye BBC, IPRC Kigali BBC, Tigers BBC, IPRC Musanze BBC, UR Huye BBC, UR-CMHS BBC, Trente Plus BBC, Shoot For The Stars BBC ndetse na UGB.
Aya makipe uko ari 13 asanzwe akina muri shampiyona y’igihugu ya Basketball, akaba agabanyijwe mu matsinda 4. Itsinda rya mbere “A”, riyobowe na REG BBC, IPRC Huye BBC, UR Huye BBC na UGB. Irya kabiri “B”, rigizwe na Patriots BBC, IPRC Kigali BBC na Shoot for the Stars BBC.
Itsinda rya 3 rigizwe na; APR BBC, Tigers BBC na UR-CMHS BBC naho itsinda rya 4 riherereyemo; Espoir BBC, IPRC Musanze BBC na 30 Plus BBC.
Ni mu gihe mu kiciro cy’abagore, hazitabira amakipe arimo; IPRC Huye BBC, Ubumwe BBC, The Hoops Rwa, APR BBC na UR Huye BBC. Aha amakipe yose azahura hazarebwe ikipe izaba iya mbere ihabwe igikombe.
Mu mwaka ushize wa 2019, REG BBC yisubije igikombe k’iri rushanwa ry’Intwari itsinze Patriots BBC ku mukino wa nyuma amanota 92 kuri 72 ni mu gihe mu bagore cyatwawe na The Hoops Rwa naho IPRC South BBC iba iya kabiri.
Mu bihembo byatanzwe, ikipe yabaye iya mbere mu byiciro byombi yahawe igikombe giherekejwe na sheki y’ibihumbi 500 by’amafaranga y’u Rwanda naho ikipe ya kabiri yahawe ibihumbi 300.
UKO AMAKIPE AZAHURA MURI IRI RUSHANWA
Kazingufu Ali, kapiteni wa REG BBC ashyikirizwa igikombe na sheki bari bamaze gutsindira
Abakinnyi ba The Hoops Rwa bishimira igikombe bari bamaze kwegukana
