Ikipe ya FC Barcelone y’Abagore yanyagiye Wolfsburg ibitego 5-1 mu mukino ubanza wa ½ cya UEFA Champions League waciye agahigo ko kurebwa n’abantu benshi ku Isi kuko witabiriwe n’abafana 91,648 i Nou Camp.
Iyi kipe yatwaye Shampiyona y’Abagore muri Espagne ndetse ikaba yaregukanye ibikombe bitatu mu mwaka ushize, yayoboye umukino n’ibitego 2-0 mu minota 10 ya mbere ibikesha Aitana Bonmati na Caroline Graham Hansen.
Jenni Hermoso na Kapiteni Alexia Putellas batsinze ibindi bitego bibiri mbere y’uko igice cya mbere kirangira ari 4-0.
Jill Roord yatsindiye Wolfsburg igitego kimwe ku munota wa 70 ariko Putellas atsinda penaliti yatumye biba 5-1 ku munota wa 85.
Wolfsburg yatwaye Champions League inshuro ebyiri, ntiyorohewe n’igitutu cy’abafana bari i Camp Nou kuko uyu mukino wanditse amateka yo kurebwa n’abagera ku 91,648.
Wakuyeho agahigo kaherukaga gukorwa n’uwahuje Barcelone na Real Madrid muri ¼ , aho warebwe n’abafana 91,553 mu kwezi gushize.
Undi mukino ubanza wa ½ cya UEFA Champions League y’Abagore uzahuza Lyon na Paris Saint-Germain zo mu Bufaransa ku Cyumweru, tariki ya 24 Mata 2022.
