Amakipe ya Banki ya Kigali muri Basketball na Vollyeball ni yo yegukanye ibikombe mu Irushanwa ngarukamwaka rihuza za Banki zikorera mu Rwanda “Interbank Sports Tournament 2022” ryasojwe ku wa Gatandatu, tariki ya 1 Ukwakira 2022.
Ni irushanwa ritegurwa n’Ishyirahamwe ry’Amabanki mu Rwanda (RBA) ku bufatanye na Kompanyi izobereye mu gutegura ibirori "General Logistic Services (GLS)", ryari rimaze ukwezi rikinwa kuko ryatangiye tariki 3 Nzeri. Amabanki agera ku 10 ni yo yaryitabiriye, andi atanu ntiyitabira kubera impamvu zitandukanye.
Amakipe yahuye mu mikino ine ari yo umupira w’amaguru, Volleyball, Basketball ndetse no Koga ‘Swimming”. Uretse mu cyiciro cyo Koga, ahandi hose yari amakipe y’abagabo gusa. Ayitwaye neza muri aya marushanwa yahawe ibikombe n’imidari mu birori byabereye kuri Central Park Nyarutarama ku wa Gatandatu, tariki ya 1 Ukwakira 2022.
Mu mu mupira w’amaguru, igikombe cyegukanywe na Equity Bank itsinze BPR ibitego 4-1 ku mukino wa nyuma wabereye kuri Stade Mumena ku wa Gatandatu.
Aya makipe yombi yari mu Itsinda B hamwe na Access Bank na I&M Bank mu gihe Itsinda A ryarimo Urwego, Bank of Africa, BK na Cogebanque.
Muri Basketball, Bank of Kigali (BK) ni yo yatwaye igikombe itsinze Cogebanque amanota 91-56.
Birasa Helcule wa I&M Bank yahembwe nk’umukinnyi watsinze amanota menshi (107), Uwase Stephanie wa Access Bank ahembwa nk’umukinnyi w’umugore witwaye neza naho umukinnyi w’irushanwa aba Icyishatse Hervé wa BK.
Abakinnyi batanu beza bagize ikipe ya Basketball muri iri rushanwa ni Muhire Pascal ((Equity Bank), Icyishatse Hervé (BK), Birasa Hercule (I&M), Shyaka Olivier (BK) na Niyonsaba Bienvenu (BK).
Muri Volleyball naho BK yatwaye umwanya wa mbere itsinze BPR Bank, naho Cogebanque iza ku mwanya wa gatatu. Sibomana Placide ‘Madison’ ni we watowe nk’umukinnyi w’irushanwa muri iki cyiciro.
Umuyobozi w’iri huriro ry’amabanki Tony Francis Ntore yavuze ko bishimiye uko imikino yagenze ndetse ndetse n’umusaruro ryatanze.
Yagize ati "Twishimiye uko iri rushanwa ryagenze, ni irushanwa rifite kinini risobanuye mu bakozi b’amabanki, kuko bakoreramo siporo zituma bagira ubuzima bwiza, ndetse bikaba n’amahirwe kuko twese tuhahurira tukaganira ndetse tukamenyana."
Iri huriro ry’amabanki mu Rwanda ryatangiye mu 2009, gusa mu 2015 ni bwo iyi mikino yatangiye kubaho, ariko ikaba yaherukaga gukinwa mu 2019 kubera icyorezo cya COVID-19.
Imikino ya nyuma mu mupira w’amaguru yabereye ku Mumena
Ni imikino yakurikiwe n’abafana
Umuyobozi w’Umujyi wa Kigali, Pudence Rubingisa, yitabiriye isozwa ry’iyi mikino
Umuyobozi w’Ihuriro ry’amabanki mu Rwanda (RBA), Tony Francis Ntore (ibumoso)
Abitwaye neza bahawe imidali
Equity yatwaye igikombe mu mupira w’amaguru
BK yishimira igikombe n’ibihembo yabonye muri Volleyball
