US Monastir yo muri Tunisia ndetse na Petro de Luanda yo muri Angola zamaze gukatisha itike yo gukina umukino wa nyuma mu irushanwa ry’Afurika ry’amakipe yatwaye ibikombe iwayo muri Basketball mu bagabo “Africa Basketball League 2022”
Mu mikino ya ½ cy’irangiza yabaye taliki 25 Gicurasi 2022, ikipe ya Petro de Luanda yo muri Angola yari yegukanye umwanya wa gatatu muri BAL 2021 yasezereye ikipe ya FAP yo muri Cameroun ku manota 88 kuri 74.
Petro de Luanda yatsinze uduce 3 twa mbere ku manota 22-13, 24-22 na 23-12 mu gihe FAP yatsinze agace ka 4 ku manota 27 kuri 19.
Umukinnyi wa Petro de Luanda, Childe Dundão ni we watsinze amanota menshi muri uyu mukino (18).
US Monastir yo muri Tunisia yageze ku mukino wa nyuma wa BAL isezereye ikipe ya Zamalek yo mu Misiri ku manota 88 kuri 81.
Ikipe ya Zamalek yatangiye neza itsinda agace ka mbere ku manota 22 kuri nyuma ikipe ya US Monastir yitwaye neza itsinda uduce dutatu twa nyuma ku manota 19 kuri 18, 29-18 na 24-23.
Mikhael McKinney wa Zamalek ni we watsinze amanota menshi muri uyu mukino (26).
Ikipe ya US Monastir yihimuye kuri Zamalek kuko muri BAL 2021 ubwo yakinwa ku nshuro ya mbere, Zamalek yatsinze US Monastir ku mukino wa nyuma iyitwara igikombe ku manota 76 kuri 63.
Gahunda y’imikino ya nyuma
Biteganyijwe ku wa Gatanu taliki 27 Gicurasi 2022 hazaba umukino wo guhatanira umwanya wa 3 uzahuza ikipe ya Zamalek ifite igikombe giheruka na FAP yari yasoreje ku mwanya wa 7 muri BAL 2021. Uyu mukino uzabera muri BK Arena kuva saa kumi n’ebyiri z’umugoroba (18h00).
Umukino wo guhatanira igikombe uzahuza ikipe ya Petro de Luanda na US Monastir, ku wa Gatandatu taliki 28 Gicurasi 2022, kuva saa kumi n’ebyiri (18h00).
Iyi mikino ya BAL 2022 yatangiye gukinwa muri Werurwe 2022 ahabeya imikino y’amajonjora yabereye i Dakar na Cairo nyuma amakipe 8 muri 12 agakomereza i Kigali mu mikino ya nyuma.
