Rutahizamu w’Umunya-Nigeria, Omoviare Babuwa Samson, wakiniraga Bavos do Maquis yo mu Cyiciro cya Mbere muri Angola, yasubiye muri Sunrise FC yo mu Burasirazuba ku masezerano y’imyaka ibiri.
Babuwa Samson yasubiye muri Sunrise FC yakiniye imyaka ine, hagati ya 2016 na 2020, akayitsindira ibitego 42.
Nyuma y’uko Sunrise FC izamutse mu Cyiciro cya Mbere mu cyumweru gishize, iyi Kipe yahereye kuri Babuwa Samson wagarutse mu Rwanda avuye muri Angola, imusinyisha imyaka ibiri.
He's back, the one and only striker, Babuwa Samson
He agrees to play for Predators next two seasons
Welcome back!!!! pic.twitter.com/QNmS25wqRH
— Sunrise Football Club (Predators) (@SunrisefcRW) June 20, 2022
Muri Gicurasi 2020 ni bwo uyu rutahizamu yatandukanye na Sunrise FC, asinyira Kiyovu Sports amasezerano y‘umwaka umwe atanzweho agera kuri miliyoni 7 Frw.
Mu mwaka yamaze mu Urucaca, Babuwa yagiye ahura n’imvune zatumye adatanga umusaruro yari yitezweho. Muri shampiyona ya 2020-21 yatsinze ibitego 3 mu mikino 5 yakinnye.
Samson Babuwa yageze muri Sunrise FC mu mwaka wa 2016-2017 avuye mu ikipe ya El Wasta yo mu cyiciro cya kabiri mu Misiri. Mu mikino 22 yakinnye muri iyi kipe yatsinzemo ibitego birindwi atanga imipira 10 yavuyemo ibitego.
Uyu mukinnyi washyingiranywe n’Umunyarwandakazi mu 2019, akunze kuvuga ko yifuza kuzakinira u Rwanda.
Ubwo Shampiyona y’Icyiciro cya Mbere mu Rwanda ya 2019/20 yasozwaga imburagihe kubera Coronavirus muri Werurwe, Babuwa ni we wari uyoboye ba rutahizamu bo mu Rwanda n’ibitego 15 mu mikino 24.
Babuwa Samson yasubiye muri Sunrise FC yagiriyemo ibihe byiza
