Mu gihe Shampiyona y’Icyiciro cya Mbere mu Rwanda yahagaze kubera imikino mpuzamahanga, amakipe amwe ari gukina imikino itandukanye ya gicuti.
Kuri uyu wa Gatandatu, tariki ya 27 Kanama 2022, APR FC yakinnye na Etincelles FC mu mukino wa gicuti wabereye i Shyorongi.
Etincelles yawutsinze ku bitego 2-0 byinjijwe na Niyonsenga Ibrahim ndetse na Izabayo Daniel.
Undi mukino wa gicuti wabaye ni uwo AS Kigali yanyagiyemo Bugesera FC ibitego 4-0 iyisanze mu Bugesera.
Abanyamujyi batsindiwe na Shabani Hussein ’Tchabalala’ winjije ibitego bibiri, Kayitaba Jean Bosco na Kone Félix.
Rayon Sports yagombaga gukina na Kenya Police FC ariko umukino wakuweho kubera ko Kenya yahagaritswe na FIFA.
Gasogi United yanganyije na AS Muhanga igitego 1-1. Ishimwe Kevin na Munezero Olivier ni bo batsindiye amakipe yombi.
Shampiyona y’u Rwanda kubera imikino ibiri y’Amavubi na Ethiopia mu ijonjora rya CHAN 2023, izasubukurwa tariki ya 6 Nzeri 2022 hakinwa umunsi wayo wa kabiri.
