Ikipe ya AS Kigali yatangaje ko amatike y’ubuntu mu myanya y’ahatwikiriye muri Stade Huye, ku mukino uzayihuza na ASAS Djibouti Télécom ku Cyumweru, yamaze gushira.
Muri uyu mukino uzabera kuri Stade ya Huye saa Cyenda, AS Kigali izaba ikeneye gutsinda kugira ngo yizere gukomeza mu ijonjora rya kabiri rya CAF Confederation Cup ya 2022/23.
Nyuma y’amasaha atageze kuri 24, ubuyobozi bwa AS Kigali butangaje ko bafana bazitabira uyu mukino izakiramo ASAS Djibouti Télécom yo muri Djibouti ku Cyumweru bazinjirira ubuntu uretse abo mu myanya y’icyubahiro bazagura amatike y’ibihumbi 10 Frw, kuri ubu imyanya isigaye irabaze.
Ku mugoroba wo kuri uyu wa Kane, tariki ya 15 Nzeri 2022, iyi kipe yatangaje ko "Amatike y’ubuntu y’ahatwikiriye (Regular) muri Stade Huye, yamaze kugurwa yose."
Regular Already ✅#Citizens #thewinningteam #HigherthanAclub #Roadtogroupstage pic.twitter.com/Oqmzq1B7Jm
— AS KIGALI (@AS_KigaliFC) September 15, 2022
Amakuru RwandaMagazine yamenye ni uko mu myanya isanzwe idakwikiriye hamaze kugurwa amatike angana na 70%, bivuze ko imyanya isigaye ingana na 30%.
Abazinjirira ubuntu biyandikisha banyuze kuri *939# ndetse ni bwo buryo bukoreshwa n’abagura amatike ya VIP agura ibihumbi 10 Frw.
Ku munsi w’umukino, hazaba kandi hari ibyo kurya no kunywa muri Stade Huye.
Umukino ubanza wabereye muri Djibouti ku wa Gatandatu, tariki ya 10 Nzeri 2022, warangiye amakipe yombi anganyije ubusa ku busa.
Mu gihe AS Kigali izaba ibashije kwitwara neza mu mukino wo kwishyura ikaba yasezerera ASAS, yazahura na A Nasry yo mu Misiri mu ijonjora rya kabiri.
