Kuri uyu wa Gatandatu tariki 4 Mutarama 2024, ikipe ya Rayon Sports yatsinze Police FC ibitego 2-0 mu mukino w’Umunsi wa 14 wabereye kuri Kigali Pele Stadium, igira amanota 36 ku mwanya wa mbere aho irusha umunani APR FC ya kabiri muri Shampiyona.
Mbere y’uyu mukino, muri itanu yaherukaga guhuza amakipe yombi muri Shampiyona, Rayon Sports yari yatsinzemo itatu, Police FC itsinda umwe mu gihe amakipe yombi yanganyije inshuro imwe.
Mbere y’uyu mukino, Rayon Sports yari yatsinze imikino ine muri itanu iheruka gukina, ndetse nyuma y’uyu mukino ntiratsindwa mu mikino 14 ya Shampiyona y’uyu mwaka.
Ku munota wa 9, Fall Ngagne yacomekewe umupira mwiza asiga myugariro Yakubu wari hasi, atera ishoti rikomeye rikuwemo na Niyongira Patience, asubijemo umupira na bwo ukurwamo n’uyu munyezamu uhise utabarwa na bagenzi be.
Ku munota wa 20 nibwo Muhire Kevin yasimbuwe na Hadji Iraguha. Ni nyuma yo kugongana na myugariro wa Police FC, David.
Ku munota wa 45, Youssou Diagne yafunguye amazamu i Nyamirambo ku mupira yaserebetse ujya mu izamu nyuma yo guhindurwa na Fall Ngagne mu rubuga rw’amahina.
Ku munota wa 62, Adama Bagayogo yinjiranye umupira mu rubuga rw’amahina, awuhinduye mu izamu Shami Carnot aritsinda.
Ku munota wa 88, Shami Carnot yahawe ikarita ya kabiri y’umuhondo, ku ikosa yakoreye kuri Aziz Bassane inyuma y’urubuga rw’amahina. Uyu mukinnyi wa Rayon Sports yari yamusize agiye kwinjira ngo atsinde.
Nyuma yo gutsinda, Rayon Sports yahise igira amanota 36 aho iri ku mwanya wa mbere, ikarusha umunani APR FC ya kabiri muri Shampiyona.
Mbere yaho, APR FC izakina na Marines FC mu mukino w’ikirarane uteganyijwe tariki ya 8 Mutarama 2025.
Rayon Sports izasubira mu kibuga yakirwa na Mukura VS ku wa 11 Mutarama mu gihe APR FC izakirwa na Amagaju FC ku wa 12 Mutarama.
Police FC yagumye ku mwanya wa kane n’amanota 23 ndetse yo yasoje imikino 15 ibanza.
