Arsenal yihereranye Tottenham y’abakinnyi 10, iyitsinda ibitego 3-1 mu mukino w’Umunsi wa cyenda wa Premier League wabereye kuri Emirates Stadium.
Muri uyu mukino wari wahuje amakipe abiri yo mu Majyaruguru ya Londres, Arsenal yafunguye amazamu ku gitego cyatsinzwe na Thomas Partey ku ishoti rikomeye yatereye inyuma y’urubuga rw’amahina ku munota wa 20.
Nyuma y’iminota 11, Tottenham yishyuriwe na Harry Kane kuri penaliti yinjije neza nyuma y’uko Gabriel yari agushije Richarlison mu rubuga rw’amahina.
Iki gitego cyabaye icya 14 Kane atsinze muri iyi ’derby’ mu mikino 18 akinnye ndetse cyabaye icya 100 atsindiye hanze y’ikibuga cya Tottenham muri Premier League.
Hashize iminota ine amakipe yombi avuye kuruhuka, Arsenal yatsinze igitego cya kabiri cyinjijwe na Gabriel Jesus ku mupira ukomeye umunyezamu Hugo Lloris yananiwe gukomeza uvuye kuri Bukayo Saka.
Ibintu byabaye bibi ku ruhande rwa Tottenham yashaka kwishyura, ubwo Emerson Royal yahabwaga ikarita itukura akiniye nabi Gabriel Martinelli ku munota wa 62.
Nyuma y’iminota itanu, Granit Xhaka yashimangiye intsinzi y’Abarashi atsinda igitego cya gatatu ku mupira wari uvuye kuri Martinelli.
Gutsinda uyu mukino byatumye Arsenal ikomeza kuyobora Premier League n’amanota 21 mu gihe Tottenham yagumye ku manota 17 inganya na Manchester City ya kabiri, yo izakira Manchester United ku Cyumweru saa Cyenda.
