Arsenal yakosoye Chelsea, Manchester City yisubiza umwanya wa mbere

Arsenal yiyongereye icyizere cyo gusoreza mu makipe ane ya mbere muri Premier League ubwo yatsindaga Chelsea ibitego 4-2 mu mukino wabereye kuri Stamford Bridge ku wa Gatatu.

Eddie Nketiah yafashije Arsenal kwinjira neza mu mukino, afungura amazamu ku munota wa 13, ariko Chelsea yishyurirwa na Timo Werner nyuma y’iminota ine.

Bidatinze, ku munota wa 27, Arsenal yabonye igitego cya kabiri cyatsinzwe na Emile Smith Rowe, ariko na cyo cyishyurwa na Cesar Aziplicueta mbere y’uko igice cya mbere kirangira, ku munota wa 32.

Igitego cya gatatu cyatsinzwe na Eddie Nketiah ku munota wa 57 na penaliti yinjijwe na Bukayo Saka ku munota wa 90 ni byo byahesheje Arsenal intsinzi ya 4-2, igira amanota 57 ku mwanya wa gatanu, iyanganya na Tottenham ya kane.

Arsenal izasubira mu kibuga ku wa Gatandatu ubwo izaba yakiriye Manchester United ya gatandatu n’amanota 54.

Chelsea yagumye ku mwanya wa gatatu n’amanota 62.

Mu yindi mikino yabaye muri Premier League kuri uyu wa Gatatu, Manchester City yisubije umwanya wa mbere n’amanota 77 nyuma yo kunyagira Brighton ibitego 3-0 byinjijwe na Riyad Mahrez, Phil Foden na Bernardo Silva.

Newcastle United yatsinze Crystal Palace igitego 1-0 naho Everton inganya na Leicester City igitego 1-1.