Ikipe ya APR FC yamaze gusinyisha abakinnyi babiri bashya bakinira ikipe y’igihugu ya Uganda, Hakim Kiwanuka ndetse na Denis Omedi.
Hakim Kiwanuka w’inyaka 24 aje muri APR FC aturutse muri Villa Sports Club ndetse yayifashije kwegukana igikombe cya Shampiyona iheruka muri Uganda.
Hakim Kiwanuka ni we watsindiye Uganda igitego rukumbi cyabonetse mu mukino wa nyuma w’ijonjora rya CHAN wabereye muri Nakivubo Stadium.
Mu mikino 15 amaze gukinira Villa Sports Club muri uyu mwaka w’imikino, muri Shampiyona ndetse na CAF Champions league, Hakim Kiwanuka amaze gutsindamo ibitego 5 anatanga imipira 4 yavuyemo ibitego.
Usibye Villa Sports Club yari amazemo umwaka umwe n’igice, Hakim Kiwanuka yakiniye Proline FC imikino 20, ayitsindira ibitego 3 anatanga imipira 6 yavuyemo ibitego.
Hakim Kiwanuka aje muri APR FC asangamo mugenzi we Thadeo Lwanga bakinana mu ikipe y’igihugu nkuru ya Uganda.
APR FC kandi yasinyishije Denis Omedi rutahizamu w’ikipe y’igihugu ya Uganda, akaba umwe mu bakinnyi 10 batsinze ibitego byiza ku Isi byatoranyijwemo icyegukanye igihembo.
Uyu rutahizamu uturutse mu ikipe ya Kitara FC muri Uganda yavutse ku itariki 13/06/1994.
Denis Omedi yatsindiye Kitara FC ibitego 14 muri Shampiyona ishize, atsindira Uganda Cranes ibitego mu mukino wayihuje na Afurika y’epfo ndetse n’uwo yakinnye na Sudan y’epfo.
Uyu ni na we wahesheje Uganda itike yo kujya mu mikino ya nyina y’igikombe cya Afurika (AFCON). Igitego yatsinze KCCA muri Shampiyona ya Uganda, muri Kanama 2024, cyari mu bitego 11 byiza byatoranyijwemo icyahize ibindi mu bihembo bya ‘FIFA Puskás Awards’, gihigikwa n’icya Alejandro Garnacho wa Manchester United. Muri ibi bihembo, igitego cye cyabaye icya gatatu n’amanota 16 mu gihe mu bihembo by’umwaka bya CAF, cyabaye icya gatandatu.
Denis Omedi
Hakim Kiwanuka
