APR FC yanganyije na Police FC ubusa ku busa mu mukino wa gicuti wabereye kuri Stade ya Kigali kuri uyu wa Kane.
Amakipe yombi yakinnye uyu mukino wabereye mu muhezo hitegurwa umwaka mushya w’imikino uzatangira tariki ya 19 Kanama 2022.
APR FC yari yabanjemo ikipe ya mbere ugereranyije n’iyabanje mu kibuga ubwo yatsindwaga na Gasogi United igitego 1-0 mu mukino wa mbere wabereye i Shyorongi mu gitondo.
Ku ruhande rwa Police FC itozwa na Mashami Vincent, na yo yari yitabaje abakinnyi bakomeye barimo umunyezamu Mvuyekure Emery, Mugiraneza Jean Baptiste ’Migi’ na Nkubana Marc baguzwe muri iyi meshyi.
Gusa, nta kipe yarebye mu izamu ry’indi muri uyu mukino wabaye mu gihe habura iminsi umunani gusa ngo Shampiyona ya 2022/23 itangire.
APR FC izasubira mu kibuga ku Cyumweru ikina na AS Kigali mu mukino wa Super Coupe mu gihe Police FC ifitanye umukino wa gicuti na Musanze FC ku wa Gatandatu.
Abakinnyi babanje mu kibuga hagati y’amakipe yombi:
APR FC: Ishimwe Jean Pierre, Fitina Omborenga, Niyigena Clément, Buregeya Prince, Niyomugabo Claude; Mugisha Bonheur, Ruboneka Bosco, Manishimwe Djabel; Byiringiro Lague, Niyibizi Ramadhan na Yves Mugunga.
Police FC: Mvuyekure Emery, Nkubana Marc, Aman, Moussa Omar, Sibomana Abuba; Mugiraneza Jean Baptiste, Pacifique, Ntirushwa Aimé; Iyabivuze Osée, Nshuti Dominique Savio na Ndayishimiye Antoine Dominique.
