Bayern Munich na Paris Saint-Germain ntizahiriwe muri UEFA Champions League y’uyu mwaka, ariko zishobora kwishimira gutwara ibikombe bya Shampiyona mu mpera z’iki cyumweru.
Muri Espagne, Real Madrid ishobora kwegukana igikombe idakinnye mu gihe mu Butaliyani bisaba gukomeza guhatana nk’uko bimeze mu Bwongereza.
Bayern Munich iregukana intsinzi ya Der Klassiker na Bundesliga icya rimwe?
Ubanza ari wo mukino ukomeye i Burayi mu mpera z’iki cyumweru?
Kuri uyu wa Gatandatu saa Kumi n’ebyiri n’igice, Bayern Munich irakina na Borussia Dortmund mu mukino ufite kinini uvuze ku gikombe cya Shampiyona ya Bundesliga.
Bayern Munich irasabwa gutsinda uyu mukino kugira ngo yegukane igikombe ku nshuro ya 10 yikurikiranya, ni nyuma y’uko harimo ikinyuranyo cy’amanota icyenda hagati yayo na Borussia Dortmund mu gihe hasigaye imikino ine.
Dortmund nta kindi ikeneye uretse gutinza ibirori bya Bayern Munich ishaka kwishimira igikombe yatwarira ku kibuga cyayo cya Allianz Arena.
Paris Saint-Gemain na yo ishaka igikombe cya 10
Nyuma yo gusoza umwaka ushize w’imikino irushwa inota rimwe na Lille yegukanye Ligue 1, kuri ubu PSG ishobora kwegukana Shampiyona y’u Bufaransa ku nshuro ya 10 mu gihe habura imikino ine.
Iyi kipe y’umutoza Mauricio Pochettino irasabwa kudatsindirwa mu rugo na Lens kuri uyu wa Gatandatu mu mukino utangira saa Tatu z’ijoro.
Mu gihe PSG yakwegukana iki gikombe, kiraba ari icya mbere cya Shampiyona kuri uyu mutoza w’Umunya-Argentine kuva asimbuye Thomas Tuchel muri Mutarama 2021.
Pochettino yavugwaga muri Manchester United ariko byarangiye akazi gahawe Umuholandi Erk ten Hag.
Kuri ubu, PSG ifite amanota 77 mu mikino 33, irusha 15 abakeba bayo Marseille mu gihe hasigaye imikino itanu.
Lens bihura, iri ku mwanya wa karindwi ndetse na yo iraba iharanira kubona umwanya wa gatatu wazayifasha gukina Champions League.
Real Madrid na yo irakoza imitwe y’intoki ku gikombe cya La Liga
Muri Espagne, Real Madrid iri ku mwanya wa mbere ntabwo izakina mu mpera z’iki cyumweru kuko iri kwitegura umukino ubanza wa ½ cya Champions League izakirwamo na Manchester City ku wa Kabiri.
Kuri ubu, Real ifite amanota 15 irusha Barcelone iyikurikiye, yo ikaba izakira Rayo Vallecano ya 14 ku Cyumweru saa Tatu z’ijoro.
Mu gihe Barça yatsindwa, Real izaba ikeneye inota rimwe gusa kugira ngo yizere kwegukana igikombe cya Shampiyona ya La Liga ku nshuro ya 35.
Mu Butaliyani baracyahatana
Nk’uko bitoroshye hagati ya Manchester City na Liverpool zitandukanywa n’inota rimwe mu Bwongereza, mu Butaliyani naho Milan AC yatangiye impera z’iki cyumweru iyoboye Serie A ariko harimo ikinyuranyo cy’amanota abiri gusa.
Gusa, Inter Milan iyigwa mu ntege ifite umukino w’ikirarane mu gihe Napoli ya gatatu irushwa amanota ane mu gihe hasigaye imikino ine.
Inter Milan irafata umwanya wa mbere nitsinda umukino yakiramo AS Roma ya gatanu kuri uyu wa Gatandatu saa Kumi n’ebyiri mu gihe Milan AC izakira Lazio ya karindwi ku Cyumweru saa Mbiri n’iminota 45.
Milan AC iheruka kwegukana Igikombe cya Shampiyona y’u Butaliyani mu mwaka w’imikino wa 2010/11.
