APR FC yangiye Rutsiro FC 6-1 mu mukino w’umunsi wa 22 wabaye ku wa Gatandatu tariki 4 Werurwe 2023 ikomeza gufata umwanya wa mbere ku rutonde rwa shampiyona n’amanota 46.
Ni umukino wabereye kuri Stade ya Bugesera aho APR FC guhera saa cyenda n’igice z’umugoroba.
Mu mikino 4 yahuje amakipe yombi nta rimwe Rutsiro FC yigeze ibasha gutsinda APR FC ndetse nta n’igitego yari yarigeze yinjiza mu izamu rya APR FC.
Ku munota wa 9, Ruboneka Bosco yafunguye amazamu ku mupira mwiza yari ahawe na Ishimwe Christian.
Omborenga Fitina yinjiye mu rubuga rw’amahina rwa Rutsiro FC ku munota wa 31 maze areba uko umunyezamu ahagaze ahita amutsinda igitego cya kabiri.
Ku munota wa 40, Bizimana Yannick yatsindiye APR FC igitego cya 3 ku mupira mwiza yari ahawe na Omborenga Fitina. Bagiye kuruhuka ari 3-0.
Ku munota wa 46, amakipe akiva mu karuhuko, Bizimana Yannick yatsinze igitego cya 4, ni ku mupira yari ahawe na Omborenga Fitina.
Nyuma y’umunota umwe gusa, Niyibizi Ramadhan yatsindiye APR FC igitego cya 5, ni nyuma y’umupira yari ahawe na Ishimwe Christian.
Rutsiro yaje gukora amateka ibona igitego mu izamu rya APR FC ku munota wa 51 kuri penaliti yatsinzwe na Nizeyimana Jean Claude bakunda kwita Rutsiro.
Ku munota wa 53, APR FC na yo yabonye igitego cya 6 kuri penaliti yatsinzwe na Nshuti Innocent. Umukino warangiye ari 6-1.
Nyuma yo kunyagira Rutsiro FC, APR FC iracyayoboye urutonde n’amanota 46, Rayon Sports ya kabiri ifite 45, Kiyovu Sports ya gatatu ifite 44, 42, AS Kigali ifite 38, Police FC ikagira 37.
Ku wa Gatanu tariki ya 3 Werurwe 2023
Gorilla FC 2-1 Marines FC
Ku wa Gatandatu tariki ya 4 Werurwe 2023
Bugesera FC 0-1 Mukura VS
APR FC 6-1 Rutsiro FC
Police FC 1-2 Kiyovu Sports
Rwamagana City 2-0 Sunrise FC
Ku Cyumweru tariki ya 5 Werurwe 2023
Espoir FC 1-0 AS Kigali
Gasogi United 1-2 Musanze FC
Rayon Sports 2-0 Etincelles
PHOTO:RENZAHO CHRISTOPHE
