Amakipe ane y’abagabo n’andi ane y’abagore yaraye ageze muri ½ cy’Irushanwa ry’Abasore neza “Taxpayers Appreciation Volleyball Tournament” risozwa kuri iki Cyumweru, tariki ya 20 Ugushyingo 2022.
Iri rushanwa riri kuba ku nshuro yaryo ya kabiri kuva tariki ya 19 Ugushyingo, ryitabiriwe n’amakipe 6 mu bagabo na 6 mu bagore, yose yo mu cyiciro cya mbere.
Mu bagabo, mu itsinda rya mbere harimo Gisagara, REGVC na KCV. Mu itsinda rya kabiri harimo APR VC, FOREFRONT na IPRC Musanze.
Mu bagore, mu itsinda rya mbere harimo RRA VC, IPRC Huye na Ruhango VC mu gihe mu Itsinda rya kabiri harimo Forefront, APR VC na IPRC Kigali.
Nyuma y’imikino y’amatsinda yabereye ku bibuga bya Kimisagara cyakiniweho n’abagore ndetse n’icya Wellspring Academy Nyarutarama cyakiniweho n’abagabo, amakipe akina ½ yaraye amenyekanye.
Mu bagabo, amakipe yakomeje ni Gisagara VC, Forefront, REG na APR mu gihe mu bagore ari Forefront, APR, RRA na Ruhango.
Muri ½ gikinirwa kuri iki Cyumweru, tariki ya 20 Ugushyingo, mu bagore; RRA VC irakina na Forefront saa Tatu muri Kigali Arena, umukino ukurikirwe n’uhuza Ruhango na APR VC saa Tanu.
Mu bagabo, Gisagara VC irakina na Forefront saa Saba mbere y’uko REG VC itangira gukina na APR VC saa Cyenda.
Kwinjira kuri iyi mikino yose ibera muri BK Arena ni ubuntu.
Ubwo iri rushanwa ryaherukaga kuba, mu bagabo Gisagara VC ni yo yaryegukanye itsinze APR VC, mu bagore RRA iba iya mbere itsinze UVC.
AMAFOTO: RENZAHO Christophe
