Umunya-Repubulika Iharanira Demokarasi ya Congo ufite inkomoko mu Bubiligi, Alain-André Landeut, yemejwe nk’umutoza mushya wa Kiyovu Sports mu myaka itatu iri imbere.
Alain-André Landeut yageze mu Rwanda ku wa Kane, tariki 28 Nyakanga 2022, akurikira imyitozo ya Kiyovu Sports bukeye bwaho.
Ku mugoroba wo ku wa Gatanu ni bwo uyu mugabo w’imyaka 45 ufite impamyabushobozi yo gutoza iri ku rwego rwa UEFA, License A itangwa n’Ishyirahamwe ry’umupira w’amaguru ku Mugabane w’i Burayi, yerekanywe nk’umutoza mushya.
Alain-André Landeut waheruka gutoza DCMP, azatoza Kiyovu Sports mu myaka itatu iri imbere aho yasimbuye Umurundi Haringingo Francis Christian wagiye muri Rayon Sports nyuma yo gufasha Urucaca kuba urwa kabiri muri Shampiyona.
