Umutoza mukuru wa APR FC, Umunya-Maroc Erradi Adil Mohammed, yemerewe gutoza imikino ya CAF ku nshuro ya mbere nk’uko byatangajwe n’iyi kipe.
Ikipe ya APR FC iri kwitegura imikino mpuzamahanga ya CAF Champions League igomba gutangira kuri uyu wa Gatandatu mu karere ka Huye yakira ikipe ya US Monastir yo muri Tunisia.
Kuri ubu umutoza w’iyi kipe, Adil Erradi Mohamed, yamaze kwemererwa gutoza iyi mikino ni nyuma y’igihe atemererwa kuyitoza.
APR FC yagize iti " Kuri ubu yiteguye gutanga ibishoboka byose ngo atahukane intsinzi muri iyi mikino dore ko iyi kipe yagiye agorwa no kuba itarifite umutoza mukuru, kubona ibyangombwa byo gutoza abakinnyi be ku ruhando rw’amahanga bikaba bigiye kongera imbaraga zisumbuyeho ku bakinnyi bitegura iyi mikino Nyafurika."
APR FC izakira US Monastir ku wa Gatandatu kuri Stade Mpuzamahanga ya Huye guhera saa Cyenda.
Adil yageze muri APR FC mu 2019. Mu nshuro ebyiri ziheruka ntiyari yemerewe gutoza nk’umutoza mukuru mu mikino ya CAF.
