Imikino

Abarinda Perezida Kagame bakomeje imyitozo yo kwitegura igikombe cy’Intwari

Editor

22 / 11 / 2024 - 04:53

Ikipe y’abasirikare barinda Perezida wa Repubulika, nyakubahwa Paul Kagame n’abandi bayobozi bakuru b’igihugu (Rep. Guard Rwanda) ikomeje imyitozo yitegura imikino ya gisirikare yo guhatanira igikombe cy’Intwari cya 2024/2025.

Imyitozo yo kuri uyu wa Kane tariki 21 Ugushyingo 2024 bayikoreye ku kibuga cy’imyitozo cya Stade Amahoro.

Imikino y’igikombe cy’Intwari iteganyijwe gutangira tariki 29 Ugushyingo 2024.

Rep. Guard iri mu itsinda rimwe na Division ya 1, Division ya 5, abasirikare barashisha imbunda ziremereye (Artillery) n’ikipe y’igisirikare kirwanira mu kirere (RAF).

Umukino wa mbere Rep. Guard Rwanda izakira iy’abasirikare barashisha imbunda ziremereye (Artillery) kuri Pele Stadium guhera saa cyenda z’umugoroba wa tariki 29 Ugushyingo 2024.

Iyi mikino igamije kwimakaza umuco wo gukora siporo no gukorera hamwe. Inafasha abasirikare kongera guhura bagasabana ari nako bagaragaza ubumenyi bafite bunyuranye haba mu mikino ndetse no mu kazi kabo ka buri munsi.

Barushanwa mu mikino itandukanye irimo umupira w’amaguru, Volleyball, Basketball, Netball, Handball, Kumasha n’Imikino Ngororamubiri.

Tariki ya 16 Kamena 2024 nibwo ikipe y’Abasikare barinda abayobozi bakuru b’Igihugu (Republican Guard), bayobowe na Capt Ian Kagame, iyi kipe yegukanye Igikombe cy’Irushanwa rya Liberation Cup itsinze iy’Ishuri ry’Imyitozo ya Gisirikare rya Nasho ibitego 3-0 ku mukino wa nyuma wabereye kuri Kigali Pelé Stadium.