Tombora y’uburyo amakipe azahura mu mikino Nyafurika ihuza amakipe, yasize APR FC izahura na US Monastir yo muri Tunisia mu ijonjora rya mbere rya CAF Champions League.
Kuri uyu wa Kabiri, tariki ya 9 Kanama, ni bwo habaye tombora y’amarushanwa Nyafurika ahuza amakipe ku cyicaro cya CAF giherereye mu Misiri.
APR FC izahagararira u Rwanda muri CAF Champions League ya 2022/23, yatomboye kuzahura na US Monastir yo muri Tunisia mu ijonjora rya mbere.
Imikino ibanza y’ijonjora rya mbere izaba hagati ya tariki ya 9 n’iya 11 Nzeri mu gihe iyo kwishyura izakinwa tariki ya 16-18 Nzeri 2022.
Ikipe izakomeza hagati ya APR FC na US Monastir, izahura na Ahly SC yo muri Misiri, yakinnye umukino wa nyuma wa CAF Champions League uheruka. Iri jonjora rya kabiri ryo rizakinwa tariki ya 7 -9 n’iya 14-16 Ukwakira 2022.
Mu mwaka ushize w’imikino, APR FC yasezerewe na Etoile du Sahel yo muri Tunisia mu ijonjora rya kabiri rya Champions League ku giteranyo cy’ibitego 5-1 (1-1, 4-0), ihita yerekeza muri CAF Confederation Cup aho yasezerewe na RS Berkane yo muri Maroc ku bitego 2-1 (0-0, 2-1), ibura amahirwe yo kugera mu matsinda.
