Urukiko rw’ubujurire rwa leta ya Amerika kuwa kabiri rwatesheje agaciro ikirego kompanyi eshanu nini z’ikoranabuhanga zarezwemo uruhare mu gukoresha abana mu birombe bya cobalt muri Repubulika ya Demokarasi ya Congo.
Icyo kirego cyarezwemo Apple, Microsoft, Tesla, Dell Technologies na kompanyi ya Alphabet ifite Google.
Urukiko rwavuze ko kuba izi kompanyi zaraguze cobalt iva muri DR Congo bidasobanuye ko zifite uruhare mu gukoresha abana imirimo y’ubucukuzi mu birombe by’ayo mabuye y’agaciro.
Umucamanza Neomi Rao yavuze ko abareze batabashije kwerekena ko kompanyi barega zifite ijambo ryahagarika gukoresha abana muri ibyo birombe.
Terry Collingsworth wunganira abarega yabwiye ibiro ntaramakuru Reuters ati: “Ntiturahagarara mu gusaba ko babibazwa”, yongeraho ko bashobora kujuririra iki cyemezo.
Iki kirego cyatanzwe mu 2019 n’ikigo giharanira uburenganzira bwa muntu, International Rights Advocates, cyari gihagarariye abana bakomerekeye mu birombe bya cobalt muri Congo n’imiryango y’abana bapfiriye muri ibyo birombe.
Mu 2021 umucamanza yatesheje agaciro icyo kirego, ariko habaho kujurira.
DR Congo itanga 60% bya cobalt ikoreshwa ku isi, ubutare bw’agaciro kandi bw’ingenzi mu gukora ibikoresho bitandukanye by’ikoranabuhanga.
Abana bagera ku 25,000 bakora mu birombe muri DR Congo, nk’uko minisiteri y’umurimo muri Amerika ibivuga, kenshi mu buryo bubi cyane.
BBC
