Minisitiri w’intebe wa Ethiopia yatangaje abaminisitiri 20 bagize Guverinoma nshya irimo abagore 10.
Atangaza iyo guverinoma kuri uyu wa Kabiri tariki 16 Ukwakira 2018, Minisitiri w’Intebe Abiy Ahmed yavuze ko icyemezo cyo gushyira abagore benshi muri guverinOma kigamije guhinyuza abasanzwe bibwira ko abagore badashoboye kuyobora. Yavuze ko bibaye ubwa mbere Ethiopia igira abagore benshi ku rugero rwa 50 ku ijana muri guverinOma mu mateka.
Icyo cyemezo cya ministiri w’intebe Ahmed kije gikurikira izindi mpinduka amaze gutangiza mu nzego zitandukanye zirimo iza politike n’ubukungu kuva agiye k’ubutegetsi. GuverinOma nshya ya Ethiopia yavuye ku ba ministiri 28. Umwe mu bagore bahawe ministeri zikomeye ni Aisha Mohammed Musa wagizwe ministiri w’ingabo.
Ethiopia yiyongereye ku bindi bihugu birimo ibyo mu burengerazuba bw’isi nk’Ubufaransa na Canada bifite abagore bagera cyangwa barenga igipimo cya 50 kw’ijana muri guverinoma.
