Kuri uyu wa Kabiri, tariki ya 7 Nyakanga 2026, hirya no hino mu Rwanda hatangijwe ibizamini bya Leta bisoza amashuri abanza (Primary Leaving Examinations - PLE) by’umwaka w’amashuri wa 2025/2026.
Mu Karere ka Kicukiro, umuhango wo gutangiza ibi bizamini wabereye ku GS Karembure, uyobowe n’Umuyobozi Wungirije w’Umujyi wa Kigali ushinzwe Ubukungu n’Imibereho Myiza y’Abaturage, wari kumwe n’abayobozi bo mu nzego zitandukanye z’uburezi n’iz’ibanze.
Abanyeshuri batangiye ibizamini basabwe kubikora batuje, birinda uburiganya no gukoresha neza ubumenyi bungutse mu myaka bamaze biga.
Imibare yatangajwe na NESA igaragaza ko muri uyu mwaka abakandida bakoze ibizamini bya PLE ari 277,452, barimo 123,101 b’abahungu na 154,351 b’abakobwa. Ibi bizamini birimo gukorerwa mu bigo by’ibizamini 1,182, byateguwe mu mashuri 3,895, bikagenzurwa n’abarimu 14,797.
Umuyobozi Wungirije w’Umujyi wa Kigali ushinzwe Ubukungu n’Imibereho Myiza y’Abaturage, Urujeni Martine
Ugereranyije n’umwaka w’amashuri wa 2024/2025, wari ufite abakandida 220,927, uyu mwaka hagaragaye iyongera ry’abakandida 56,525, rikomeje kugaragaza ko umubare w’abagera ku musozo w’amashuri abanza ukomeje kuzamuka.
NESA yanatangaje ko abakandida 928 bafite ibibazo byihariye (Special Educational Needs - SENs) na bo bari gukora ibi bizamini. Muri bo harimo abahungu 376 n’abakobwa 552, bakaba barateguriwe ubufasha bwihariye burimo inyandiko za Braille, inyandiko nini, kongererwa igihe cyo gukora ibizamini, abasemuzi b’ururimi rw’amarenga n’ibindi bikoresho bibafasha gukora ibizamini mu buryo bungana n’abandi.
Ibizamini bya PLE bizakomeza kugeza ku wa 9 Nyakanga 2026, aho abanyeshuri bazakora amasomo arimo Imibare, Ikinyarwanda, Icyongereza, Ubumenyi n’Ikoranabuhanga (Science and Elementary Technology), ndetse Social and Religious Studies.
