Ikipe ya Rayon Sports igiye gukomeza mu cyiciro cya nyuma gishyira amatsinda ya CAF Confederation Cup bitayisabye gutsinda ikipe ya AS Onze Créateurs mu mukino wo kwishyura, nyuma yaho FIFA ihagarikiye ishyirahamwe ry’umupira w’amaguru muri Mali, FEMAFOOT.
Ku wa Kane tariki ya 10 Werurwe ni bwo Minisitiri w’Imikino muri Mali aherekejwe n’abahesha b’inkiko ndetse n’abandi bayobozi ba siporo muri iki gihugu, bashyize mu bikorwa icyemezo bari bafashe ku munsi tariki 08 Werurwe 2017 cyo gusesa burundu ishyirahamwe ry’umupira w’amaguru muri Mali.
Ku munsi w’ejo tariki 16 Werurwe 2017 nibwo impuzamashyirahamwe ry’umupira w’amaguru ku isi , FIFA , ryahagaritse ishyirahamwe ry’umupira w’amaguru muri Mali igendeye kuri iki cyemezo Minisiteri y’imikino yafashe cyo gusesa ishyirahamwe rya FEMAFOOT.
Iki cyemezo gikubiye mu ibaruwa Fatma Samoura, umunyamabanga mukuru wa FIFA, yandikiye Perezida wa FEMAFOOT wakuweho, Boubacar Baba Diarra amumenyesha ko FEMAFOOT ihagaritswe ndetse n’amakipe yose yo muri Mali yari ari mu marushanwa mpuzamahanga.
Muri iyi baruwa CAF yanahaweho kopi, Fatma Samoura avugamo ko iki cyemezo gikwiriye gutangira gushyirwa mu bikorwa guhera kuri uyu wa gatanu tariki 17 Werurwe 2017. Igika gisoza cy’iyi baruwa kigira iti:
“ Kubw’iyo mpamvu FEMAFOOT itakaje uburenganzira bwayo nk’umunyamuryango. Ibyo bisobanuye ko ntakipe n’imwe cyangwa se n’izishamikye kuri FEMAFOOT yemerewe gukina imikino mpuzamahanga cyangwa kugira igikorwa cya siporo ikorana n’abanyamuryango ba FIFA. Ibi kandi bisobanuye ko FEMAFOOT n’abanyamuryango bayo batagifite uburenganzira kuri porogaramu z’iterambere zitegurwa na FIFA cyangwa CAF. FIFA igiye kumenyesha abanyamuryango bayo iby’iki cyemezo.”
Fatma Samoura yasoje asaba Perezida wa FEMAFOOT ko bazabamenyesha icyahinduka cyose kuri iki cyemezo cyafashwe na Minisiteri y’imikino muri Mali.
Ibaruwa FIFA yandikiye FEMAFOOT iyimenyesha ko iyihagaritse ndetse n’amakipe yayo ko atemerewe kwitabira amarushanwa mpuzamahanga
Iki cyemezo cya FIFA kiratuma amakipe ya AS Djoliba na Onze Créateurs de Niaréla yari ahagarariye Mali muri CAF Confederation Cup ahita aterwa mpaga adakinnye imikino yo kwishyura, mu gihe iki gihugu kitazanitabira amajonjora yo gushaka itike yo kujya mu gikombe cya Afurika cya 2019 aho yagombaga gukina na Gabon muri Kamena.
CAF nayo yahamije iby’isezererwa rya Onze Créateurs
Ibyari byitezwe nibyo ishyirahamwe ry’umupira w’amaguru muri Afurika , CAF yakoze. CAF yasohoye itangazo rikuraho umukino wo kwishyura wagombaga guhuza Rayon Sports na AS Onze Créateurs de Niaréla yo muri Mali kuri Stade Amahoro kuri uyu wa Gatandatu, tariki ya 18 Werurwe 2017.
Nkuko byemejwe n’Umunyamabanga Mukuru wa CAF, Hicham El Amrani abinyujije mu itangazo yashyizeho umukono rigashyikirizwa FERWAFA, yagize ati “ Twamenyeshejwe na FIFA ko Ishyirahamwe ry’Umupira w’Amaguru muri Mali ryahagaritswe mu bikorwa byose by’umupira w’amaguru. Kubera iyo mpamvu amakipe ahagarariye Mali mu marushanwa mpuzamahanga ntiyemerewe gukina imikino yayo mu mpera z’iki cyumweru. ”
Ibaruwa ya CAF
Ibinyujije kuri Twitter, FERWAFA nayo yemeje ko Rayon Sports yakomeje
Ikipe ya Rayon Sports ihagarariye u Rwanda mu irushanwa rihuza amakipe yatwaye ibikombe by’ibihugu Africa Total CAF Confederation Cup . Mu mukino ubanza wakinywe tariki 11 Werurwe 2017, ubera i Bamako muri Mali, Onze Créateurs yari yatsinze Rayon Sports 1-0 cyatsinzwe na Boubacar Samassekou.
Umukino wo kwishyura wari uteganyijwe kubera kuri Stade Amahoro kuri uyu wa gatandatu itariki 18 Werurwe 2017 guhera i saa cyenda n’igice z’umugoroba. Ikipe ya Onze Créateurs yari yamaze no kugera mu Rwanda kuri uyu wa kane tariki 16 Werurwe 2017.
INKURU BIJYANYE:
######