Polisi yo muri leta ya Zamfara mu majyaruguru ashyira uburengerazuba bwa Nigeria yataye muri yombi abantu bane bacyekwaho kurya abantu no kugurisha ibice by’umubiri - ikintu kidasanzwe muri ako karere.
Abo bacyekwa bafashwe nyuma yuko abapolisi basanze umurambo mu nzu irimo kubakwa, utariho ibice bimwe by’umubiri, nkuko umukuru wa polisi muri iyo leta Ayuba Elkana yabibwiye abanyamakuru ku wa kane.
Ibyo byagezweho mu iperereza ku mwana w’umuhungu w’imyaka icyenda waburiwe irengero.
Abo bacyekwa, abagabo babiri n’abahungu babiri b’ingimbi, batawe muri yombi mu cyumweru gishize, nkuko Bwana Elkana yabivuze, yongeraho ko abandi bacyekwa.
Uwo mukuru wa polisi yavuze ko amaperereza yahishuye ko ucyekwaho kuba umukuru w’icyo gico, hari inshuro ebyiri yarishye abandi bacyekwaho kurya abantu akabaha ama-naira 500,000 (miliyoni 1,2 mu mafaranga y’u Rwanda) mu kugura ibice by’imibiri y’abantu.
Leta ya Zamfara ni imwe muri za leta zugarijwe bikomeye n’inkubiri y’ubwicanyi muri Nigeria, ndetse no gushimuta abantu hagasabwa indishyi kugira ngo barekurwe. Ni mu gihe abategetsi barimo kunengwa kunanirwa guca ibikorwa by’urugomo.
Mu cyumweru gishize, amakuru avuga ko abantu batari munsi ya 200 biciwe mu rukurikirane rw’ibitero byagabwe mu byaro byinshi byo muri iyi leta.
BBC
